•Dag een: God skei lig en donker van mekaar.
•Dag twee: God skei die waters van die hemel van die water op aarde.
•Dag drie: God skep verskillende plante en vrugtebome wat met hul saad self kan vermeerder.
•Dag vier: God skep die son, maan en sterre sodat dag en nag onderskei kan word.
•Dag vyf: God skep die visse van die see en die voëls in die lug.
•Dag ses: God skep al die diere op die aarde. Dan kom Hy by die kroon van sy skepping, die mens. Die enigste wese wat God na sy beeld geskape het om oor die skepping te heers.
•Dag sewe: God rus. Die skepping was voltooi.
In Genesis 1:31 vind ons God se reaksie op sy skepping: “Toe het God gekyk na alles wat Hy gemaak het, en dit was baie goed.” Wanneer God skep, is dit nie net beter as maxima cum laude nie, dit is perfek!
week 6 . dag 2
God skep beter as maxima cum laude
Wanneer laas het jy ’n oomblik stilgesit en God se skepping aanskou? Wanneer laas het jy Hom vir die lewe op aarde gedank? Hier is vyf interessante en snaakse feite van mense, diere en plante om die grootheid van God se skepping te vier:
Mense
•’n Volwasse mens het 206 bene in sy liggaam. As baba het ons egter 300 bene. Soos ons ouer word, groei van die bene aan mekaar vas.
•’n Gemiddelde mens lag 13 keer per dag.
•Ons breinselle leef die langste in ons liggame – soms selfs vir ’n hele leeftyd.
•Die tong is die sterkste spier in die liggaam.
•’n Mens se ore en neus hou nooit op groei nie.
Landdiere en insekte
•Die blouwalvis se geluid van 188 desibels kan tot 853 kilometer ver gehoor word.
•’n Kat het 32 spiere in elke oor.
•’n Muskiet het 47 tande.
•Geen twee sebras se strepe is presies dieselfde nie.
•Die rede waarom heuning so maklik verteer, is omdat dit reeds een maal deur die by verteer is.
Waterdiere
•’n Goudvis kan tot twintig jaar oud word.
•’n Seekat se pupil is driehoekig.
•Groter haaie kan tot 100 jaar oud word.
•Krokodille sluk klippe in sodat hulle dieper in die water kan afduik.
•’n Kreef het blou bloed.
Voëls
•’n Volstruis se oog is groter as sy brein.
•’n Voël se hart klop 400 keer per minuut wanneer dit rus en 1 000 keer per minuut wanneer dit vlieg.
•Voëls het meestal drie ooglede om hul oë te beskerm en skoon te hou.
•’n Haan kan nie kraai as hy nie sy nek kan uitrek nie.
Plante
•’n Komkommer bestaan uit 96% water en ’n rou appel uit 84% water.
•Amandels is die oudste en bekendste neute ter wêreld.
•Dit neem die koffieplant vyf jaar voordat dit vir die eerste keer vrugte dra.
•Bome verlaag die omgewing se temperatuur deur die water wat uit die blare verdamp.
Nadat God die mens op die sesde dag geskape het, het Hy ons ’n opdrag gegee: “Wees vrugbaar, word baie, bewoon die aarde en bewerk dit. Heers oor die visse in die see, oor die voëls in die lug, oor al die diere van die aarde, ook oor die diere wat op die aarde kruip.” Sien jy om na die skepping met die wete dat dit aan God behoort?
Wanneer God skep, is dit ver beter as maxima cum laude, dit is perfek!
Vader God, baie dankie vir u perfekte skepping waarin ons kan woon. Help my asseblief om daagliks my oë oop te hou vir geleenthede waar ek beter na u skepping kan omsien. Ek vra dit in die Naam van Jesus Christus. Amen.
week 6 . dag 3
God skep beter as maxima cum laude
Aan die een kant vind ons vulkane, tsunami’s, aardbewings, windstorms, siklone en tifone. Aan die ander kant asemrowende sonsondergange, majestueuse bergreekse en watervalle wat ’n mens na jou asem laat snak. Besef jy dat dit dieselfde God is wat alles gemaak het en in beheer daarvan is?
Psalm 24:1-2: “Die aarde en alles wat daarop is, die wêreld en dié wat daar woon, alles behoort aan die Here …”
Hier is ’n paar interessante feite om die skepping en almagtigheid van God te vier:
1.Wat is die warmste plek op aarde?
El Azizia in Libië. Die warmste temperatuur van 57,8 °C is op 13 September 1922 gemeet.
2.Wat is die koudste plek op aarde?
Vostok in Antarktika. Die koudste temperatuur van -89 °C is op 21 Julie 1983 hier aangeteken.
3.Waar is die hoogste waterval ter wêreld?
Die Angel-waterval in Venezuela val 979 meter ver. Die Tugela-waterval in Suid-Afrika is die naashoogste waterval en val 850 meter ver. (Interessantheidshalwe: Tafelberg is 1 086 meter hoog.)
4.Hoe ver is die naaste ster aan die aarde?
Die ster Proxima Centauri is 39 934 310 miljoen kilometer van die aarde af. Dit sal ’n ruimtetuig wat teen 40 237 kilometer per uur reis, 112 200 jaar neem om dié ster te bereik.
5.Waar is die grootste diepsee-klowe ter wêreld?
Marianas is 10,9 kilometer diep en Tonga 10,8 kilometer. (Interessantheidshalwe: Mount Everest, die hoogste berg op aarde, is 8,85 kilometer hoog. Die water sal dus die berg kan toemaak.)
6.Waar is die grootste meteorietkrater ter wêreld?
By Vredefort in die Vrystaat is die grootste bekende meteorietkrater ter wêreld met ’n deursnee van sowat 300 kilometer.
7.Kleinste …
•voëltjie: Die kleinste voëltjie is die bee hummingbird. Dit is slegs vyf sentimeter lank.
•perd: Die dwergperdjie is slegs 43,18 sentimeter hoog.
•hond: Die chihuahua is 12,7 sentimeter hoog.
•hamster: Slegs 2,5 sentimeter lank.
•verkleurmannetjie: Slegs 1,2 sentimeter lank.
In Job 38:4-5 demonstreer God sy almag aan Job wanneer Hy reguit met hom praat: “Waar was jy toe Ek die aarde se fondamente gelê het? Wie het die aarde afgemeet? Wie het hom aanmekaargesit daardie oggend toe die sterre saamgesing het en al die hemelinge gejubel het? Ek het vir hom perke gestel, hom agter slot en grendel gesit. Ek het gesê: ‘Tot hiertoe mag jy kom, nie verder nie; hier is die grens van jou magtige golwe.’ ”
Bevraagteken jy soms soos Job iets wat God doen of gedoen het of kies jy om sy almag raak te sien en Hom daarvoor te loof en te prys? Onthou, wat God doen, is altyd ver beter as maxima cum laude. Wat Hy doen (selfs al verstaan ons dit soms nie), is altyd perfek.
Vader God, baie dankie dat dit wat U doen perfek is. Vergewe my asseblief as ek soms perspektief verloor en u wil bevraagteken. Ek vra dit in die Naam van Jesus Christus. Amen.
week 6 . dag 4
Teksverse en vrae
Teksverse vir die week
•Genesis 1:31: “Toe het God gekyk na alles wat Hy gemaak het, en dit was baie goed.”
•Genesis