Was God tussen die skare atlete op pad Durban toe? Was God langs die swembad toe die negejarige Julia amper verdrink het? Was God onder die water toe die akteur in die helikopter vasgevang was? Natuurlik. God is EMMANUEL. God met ons. Hy is vandag ook in jou situasie!
Vader God, baie dankie dat U by my is. Help my asseblief om dit nooit te vergeet nie. Ek vra dit in die Naam van Jesus Christus. Amen.
Kyk na foto’s van die stories by www.benescke.co.za
week 10 . dag 3
God, ons Emmanuel
In Psalm 23:4 lees ons dat wanneer ons deur “ ’n dal van doodskaduwee” stap, God ons beskerm en bewaar. Die bekende regisseur Reghardt van den Bergh het ’n belewenis gehad waar hierdie belofte vir hom ’n werklikheid geword het. Hier is sy verhaal.
“Ek en my familie was baie opgewonde om een aand op ’n semi-wildplaas in die veld te gaan slaap. Ons het besluit om op ’n sleepwa te slaap om die slange, skerpioene en spinnekoppe wat dalk in ons ore kon kruip, te vermy. Waar ons ’n hele entjie van die plaasopstal geslaap het, was daar geen selfoonopvangs nie. Dit was ’n perfekte aand waarin ons na die sterre en nagapies kon kyk terwyl ons gelê en lag en gesels het.
“Êrens deur die loop van die nag het ek skielik wakker geskrik met ’n intense pyn op my maag. Dit het gevoel asof ek besig was om te sterf. Terwyl ek opgekrul in ’n fetusposisie op die wa gelê het, het ek deur my pyn begin om God aan te roep. Ek het aanhoudend bly sê: ‘Vader, dit is deur Jesus se wonde dat ons genesing ontvang. Ek bid vir daardie genesing.’ Die pyn het egter net vererger. In ’n stadium was die pyn so erg dat ek wou flou word.
“In my geestesoog kon ek sien hoe my kinders deur die veld moet stap om hulp te gaan kry omdat daar nie selfoonopvangs was nie en ook hoe die helikopter my in die middel van die veld moet kom oplaai.
“ ’n Oomblik het ek te midde van hierdie worsteling begin wonder of ek dan werklik ’n kind van God is. Ek het dan die Skrif bely en steeds wou die pyn nie weggaan nie. Skielik het daar ’n bewustheid in my gees opgekom dat God nooit verander nie. God bly God, ongeag of ek sy kind is.
“Hierdie besef het my gebede in ’n oogwink verander. Ek het nou besef dat of ek gesond word of nie, God soewerein bly. In my pyn het ek al hoe meer teen die wa begin afskuif na waar ek toe amper op die grond gelê het. Met al my krag het ek te midde van my pyn my bes gedoen om my hande in die lug te steek om God te prys vir wie Hy is. Hy is wonderbaarlik, die Koning van die konings en die Heerser van die heersers. Ook is Hy die Skepper van lewe.
“Terwyl ek my hande na God oplig, was dit asof die Heilige Gees my regterhand gevat het en dit op my maag gedruk het. Toe my hand aan my maag raak, het die pyn skielik verdwyn. Só skielik was die pyn weg dat ek ’n oomblik gedink het dat ek dood is.
“Dit is egter toe ek die kameeldoringbome in die blou lug van die horison sien, dat ek besef het God was by my en dat Hy my genees het. Hy is ’n werklikheid en Hy is altyd daar.”
God is EMMANUEL. Hy is altyd met ons, selfs al voel dit soms asof ons alleen is. Luister weer na God se belofte in Hebreërs 13:5: “Ek sal jou nooit verlaat nie, jou nooit in die steek laat nie.” Wat is jou reaksie wanneer jy magteloos voel? Draai jy net soos Reghardt eerste na God?
Vader God, baie dankie dat U met my is en dat ek te alle tye na U kan uitroep. Lei my asseblief sodat ek altyd bewus kan wees van u teenwoordigheid. Ek vra dit in die Naam van Jesus Christus. Amen.
Kyk na ’n foto van Reghardt en sy familie by www.benescke.co.za
week 10 . dag 4
Teksverse en vrae
Teksverse vir die week
•Jesaja 43:2: “As jy deur water moet gaan, is Ek by jou, deur riviere, hulle sal jou nie wegspoel nie; as jy deur vuur moet gaan, sal dit jou nie skroei nie, die vlamme sal jou nie brand nie …”
•Hebreërs 13:5: “Ek sal jou nooit verlaat nie, jou nooit in die steek laat nie.”
Vrae om oor na te dink
1.God is EMMANUEL – God met ons. Wat beteken dit vir jou?
2.Lees weer Jesaja 43:2. Wat gaan jou reaksie wees wanneer jy jou weer in ’n noodsituasie bevind?
3.Lees weer Hebreërs 13:5. Wat doen jy wanneer jy alleen voel?
week 11 . dag 1
Familie
God is ’n God van orde. Dít vind ons regdeur die skepping. Neem gesonde gemeenskappe as ’n voorbeeld. Gesonde gemeenskappe word opgebou deur gesonde gesinne. Die geheim van ’n gesonde gesin is om God se rangorde te volg: God heel bo, dan die man, dan die vrou, dan die kinders en heel onder die diereryk.
Sou enigeen van hierdie groepe uit die rangorde beweeg deurdat een gesinslid ’n ander se plek probeer inneem (byvoorbeeld, ’n vrou wat haar man se gesag ondermyn en self die hoof van die huis probeer wees of kinders wat teen hul ouers rebelleer, ensovoorts) veroorsaak dit wanorde wat die hele gesin raak. Ook laat dit ’n gaping in die piramiede wat ’n geleentheid vir die vyand skep om die hele gesin aan te val en te verwoes.
Net soos wanorde konflik veroorsaak, families laat uitmekaar spat en gesinslede van mekaar vervreem, sal vrede en kalmte neerdaal wanneer al die lede van die gesin hul plekke inneem soos wat God dit bepaal.
FAMILIE was deel van God se skeppingsplan vir die wêreld. Eer jy God deur terug te klim in die orde wat Hy vir die huisgesin bestem het?
Die rol van elke familielid:
•Man teenoor vrou: Kolossense 3:19; Efesiërs 5:21, 25-29; 1 Petrus 3:7.
•Vrou teenoor man: Titus 2:4-5; Kolossense 3:18; Efesiërs 5:21-24.
•Pa teenoor kinders: Efesiërs 6:4; Kolossense 3:21; Spreuke 13:24; 19:18; 29:17; Hebreërs 12:7-10.
•Ma teenoor kinders: Titus 2:4; 1 Timoteus 5:14; Spreuke 31:10-31.
•Kinders teenoor ouers: Kolossense 3:20; Efesiërs 6:1-3; Spreuke 31:28.
week 11 . dag 2
Familie is vir God belangrik
Dit was ’n koue, reënerige winterdag in 1993 toe Werner en Maria Leuschner-Rabie die man langs die plaaspad in KwaZulu-Natal sien staan. Hoewel Werner nooit rylopers oplaai nie, het hy die man jammer gekry. Hulle het hom opgelaai – min wetend hoe hierdie ontmoeting hul lewens sou verander …
Sowat 50 jaar voor daardie dag het loeiende sirenes tydens die Tweede Wêreldoorlog in die ooste van Duitsland die gemeenskap teen ’n komende bomaanval gewaarsku. Oud en jonk het hulle na die ondergrondse skuilplekke gehaas. Toe die valdeur van een van die ondergrondse skuilkamers toegaan, het die negejarige Werner Leuschner met ’n skok besef dat hy sy broers en susters in die massas verloor het.
Omdat Werner se ouers albei reeds vroeër in sy lewe gesterf het, het sy ouer broers en susters hom grootgemaak. Toe hy hulle die volgende dag nie dadelik kon opspoor nie, is hy summier saam met ’n klomp ander weeskinders per skip na Kaapstad gestuur. Dit was deel van die Duitse regering se poging om die kinders tydens die oorlog te beskerm. In Kaapstad is Werner deur ’n Afrikaanse gesin aangeneem. Met die streng aannemingswette van daardie tyd is die klein Duitse seuntjie se verlede in ’n oogwink uitgewis. Al wat hy oorgehou het, was sy geboortevan, sy herinnerings aan sy gesin in Duitsland en ’n brandende begeerte om weer met hulle herenig te word.
As volwasse man is Werner met Maria getroud. Hy het steeds ’n diepe verlange en hunkering na sy familie in Duitsland gekoester. Daarom het hulle saam met hul gemeente en Bybelstudiegroep jare lank gebid dat God sou ingryp om hom weer met sy familie te herenig.
Toe Werner en Maria die man op die reënerige nag langs die pad opgelaai het, het hulle gehoor dat