Amen
16 Februarie
Spoor mekaar aan tot goeie dade
Lees Hebreërs 10:19-25
Laat ons ook na mekaar omsien deur mekaar aan te spoor tot liefde en goeie dade – Heb 10:24
Vroue is gewoonlik dié persone in die huweliksverhouding wat die maklikste na ander uitreik, terwyl dit vir mans moeiliker is. Gemeentes het deesdae baie programme wat dit vir ons moontlik maak om na ander Christene uit te reik en om goeie dade aan ander te doen. As jý ’n Christenvrou is wat graag in gemeenteverband aktief is, maak seker dat jy jou man ook by hierdie bediening van jou betrek.
Die skrywer van Hebreërs beveel aan dat julle na mekaar sal omsien deur mekaar tot liefde en goeie dade aan te spoor. Dit is baie bevredigend en bevorderlik vir ’n huwelik wanneer twee huweliksmaats besluit om sáám dinge vir ander mense te doen. Om saam sop te kook en dit by die nagskuiling te gaan aflewer; om saam van die groente in jul tuin te neem vir mense wat dit nodig het; om saam artikels uit te soek wat julle nie langer nodig het nie en dit vir mense te neem wat minder as julle het; om saam pasiënte in die plaaslike hospitaal te besoek en vir hulle ’n blommetjie of eetgoed te neem.
Almal van ons het ook spesifieke gawes gekry wat ons vir ons gemeente kan aanbied. Ek en my man skryf dikwels artikels in ons gemeente se nuusbrief. Moenie langer uitstel om saam betrokke te raak by God se koninkryk nie. Besluit saam om van nou af jul spesifieke gawes tot eer van God in jul gemeente te gebruik.
Here, dankie vir gawes wat ons sáám in u diens en tot u eer kan aanwend. Wys vir ons as huweliksmaats waar U ons in ons gemeente wil gebruik.
Amen
17 Februarie
Hoër as jouself
Lees Filippense 2:1-4
Moet niks uit selfsug of eersug doen nie, maar in nederigheid moet die een die ander hoër ag as homself – Fil 2:3
Paulus skryf aan die gemeente in Filippi dat hulle sy hart bly moet maak deur niks uit selfsug of eersug te doen nie, maar dat die een die ander hoër behoort te ag as homself. Dit is nie net goue raad vir menseverhoudings nie, maar ook vir die huwelik. Vandag se selfstandige, geëmansipeerde vroue slaan nederigheid nie eintlik hoog aan nie. Tog is die teks uit Filippense hierbo een van die grootste geheime van ’n gelukkige huwelik. Net dié huweliksmaat wat geleer het om die ánder een eerste te stel, gaan uiteindelik ontdek dat die huwelik ’n fees is en ’n fees sal bly.
Hoe belangrik is jou man vir jou? Belangriker as jyself? “Die liefde […] soek nie sy eie belang nie,” maan 1 Korintiërs 13:5. In die huwelik is onselfsugtigheid baie belangrik. As jy gedurig aan jouself dink en selfsugtig optree, gaan jou huwelik daaronder ly. Dink liewer aan maniere waarop jy vir jou man kan wys dat hý vir jou eerste kom: Vertel hom hoe belangrik hy vir jou is; maak sy gunstelingkos; bederf hom op verskillende maniere. Gaan saam met hom rugby kyk of stel voor dat julle die cowboy-fliek gaan kyk wat jy weet hy lankal wil sien, al sal jý veel eerder die nuwe romantiese musiekblyspel wil sien.
Volg Paulus se raad in Filippense 2:4 as jy jóú huwelik wil laat blom: “Julle moenie net elkeen aan sy eie belange dink nie, maar ook aan dié van ander.”
Here, ek is basies so selfsugtig dat ek maar sukkel om my huweliksmaat se belange eerste te stel. Help my asseblief om in die vervolg my man se behoeftes voorop te stel.
Amen
18 Februarie
Onthou die dankies!
Lees 1Tessalonisense 5:12-22
Wees in alle omstandighede dankbaar, want dit is wat God in Christus Jesus van julle verwag – 1 Tess 5:18
My man het die wonderlike gewoonte om soggens die kombuis aan die kant te maak. (Hy staan baie vroeër as ek op!) Soms gaan dit so dol by ons dat ek hierdie liefdesdaad nie eers raaksien nie. Wanneer hy dan so terloops vra of ek gesien het hoe mooi aan die kant die kombuis is, kan ek myself skop omdat ek nie meer oplettend was en op ’n spesiale manier dankie gesê het vir dié stukkie bedagsaamheid nie.
Is jý ’n dankbare huweliksmaat? Wanneer laas het jy vir jou man vertel hoe dankbaar jy is vir al daardie dinge wat hy vir jou in die huis doen, vir sy harde werk in die tuin, vir sy omgee en sorgsaamheid, vir die tyd wat hy saam met die kinders deurbring? Wat maak jy as jy sien dat die stukkende gloeilamp in jou studeerkamer vervang is of jou vuil motor blinkskoon gewas is? Sê jy dankie of aanvaar jy dit maar as vanselfsprekend?
Stel vir jou ’n lysie op van al daardie dinge waarvoor jy dankbaar is en vir jou man ’n dankie skuld – en sê dan vir jou man élke dag dankie vir een van hulle.
“Binne die huwelik is die dankbaarheid ’n soort lewensvog. Die bedanking word ’n bedinking van wat tussen ons bestaan,” vat Piet Zuidgeest dit netjies saam. As jou man ervaar dat jy erkentlik is teenoor al die dinge wat hy doen, sal hy sy bes probeer om ’n nóg beter man vir jou te wees.
Vader, ek bid dat U my sal help om my dankbaarheid meer in woorde om te sit sodat my huweliksmaat sal weet dat ek hom liefhet en waardeer.
Amen
19 Februarie
Ai, die liewe geduld!
Lees Kolossense 3:12-17
Wees geduldig met mekaar en vergewe mekaar as die een iets teen die ander het. Soos die Here julle vergewe het, moet julle mekaar ook vergewe – Kol 3:13
Paulus vra mooi dat die gemeente van Kolosse bereid sal wees om geduldig met mekaar te wees en mekaar te vergewe. Sommige van ons het baie meer geduld as ander. En álmal van ons raak by tye baie ongedurig met ons huweliksmaat. Wanneer dit gebeur, behoort ons gewillig te wees om geduld aan die dag te lê en te vergewe.
As jy maklik ongeduldig of geïrriteerd raak, is dit goue raad om eers tot tien te tel wanneer jy kwaad is voordat jy vir jou man dinge sê waaroor jy later vir altyd spyt gaan wees. (As jy báie vies is, tel tot honderd!) Die Griekse woord wat in ons Bybel met “geduld” vertaal word, beteken eintlik om iemand nóg ’n kans te gee. Maak dit ’n lewenswyse om nie jou geduld met jou man te verloor nie, maar om hom elke keer nóg ’n kans te gee as hy teenoor jou fouteer. Dis maklik om dit reg te kry as jy aan al die baie kere dink wat die Here dit met jóú moet doen! “Gee mekaar ’n kans sonder om mekaar met kritiek uitmekaar te skeur. Kyk ook by mekaar se foute verby. Die Here het immers by al jul foute verbygekyk. Daarom word niks minder van julle verwag nie!” lui vandag se teksvers in Die Boodskap-vertaling.
’n Gelukkige huwelik bestaan uit twee vergewers, sê die bekende huweliksraadgewer Arnold Mol. Wees altyd bereid om jou man te vergewe as hy foute maak.
Hemelse Vader, U is so oneindig geduldig en vergewensgesind met my. Help my om op dieselfde manier teenoor my huweliksmaat op te tree.
Amen
20 Februarie
Pasop vir die val-slag!
Lees 1 Korintiërs 10:9-13
Daarom, wie meen dat hy staan, moet oppas dat hy nie val nie. Geen versoeking wat meer is as wat ’n mens kan weerstaan, het julle oorval nie. God is getrou. Hy sal nie toelaat dat julle bo julle kragte versoek word nie –