Here, ek is jammer dat ek nog so min van die “nuwe mens” se eienskappe in my eie huwelik uitleef. Help my asseblief om meelewend, goedgesind, nederig, sagmoedig, geduldig en vergewensgesind te wees en my man baie lief te hê.
Amen
25 Februarie
Gebruik julle tyd ten beste
Lees Psalm 90
Leer ons ons dae so gebruik dat ons wysheid bekom – Ps 90:12
Dis maklik om tyd te mors in ’n huweliksverhouding, om dinge te doen wat nie eintlik waarde het nie. Daar is ook baie nodige dinge wat hope tyd insluk. Volgens ’n onlangse Amerikaanse opname gebruik die deursnee-Amerikaner in ’n leeftyd agt maande om gemorspos oop te maak, hulle wag nege maande van hul lewe in verkeersknope (ek het so ’n idee dat dit in SA heelwat langer is!) en hulle bring sewe jaar in die badkamer deur! Uiteindelik is daar net vyf honderd dae in die ses en dertig jaar (die duur van ’n gemiddelde huwelik) oor wat jy kan doen wat jý graag wil. Dit sal dus goed wees as júlle jul daarop kan toespits om dinge sáám te doen wat jul huwelik gelukkiger en jul geestelik sterker sal maak.
Maak meer tyd vir mekaar; ruim elke dag geselstyd in, al is dit net ’n paar minute, gaan drink elke week saam koffie – al is dit tuis wanneer die kinders slaap. Vra soms jul ouers om na die kinders te kyk sodat julle ’n dag of naweek alleen kan wegkom. Saamweestyd doen wonders vir ’n huwelik.
Hou huisgodsdiens saam – ook sónder die kinders. As julle nie daarvan hou om hardop te bid nie, neem beurte om ’n deel uit die Bybel te lees en bid dan sag saam. Daardie tyd wat met mekaar én met God bestee is, is tyd wat groot dividende in ’n huwelik oplewer.
Vader, sal U ons asseblief wys hoe ons in óns huwelik die tyd tot ons beskikking op die heel beste manier kan benut. Leer ons om gehaltetyd saam te spandeer sodat ons saam nader aan U en aan mekaar sal groei.
Amen
26 Februarie
Wanneer julle nie self verder kan nie
Lees 1 Korintiërs 1:8-11
Die swaar wat ons moes verduur, het ver bo ons kragte gegaan, sodat ons selfs die hoop om te bly lewe, laat vaar het […] Maar dit het gebeur, sodat ons nie op onsself sou vertrou nie, maar op God […] – 2 Kor 1:8-9
Daar kom krisistye in enige huwelik wanneer dit onmoontlik lyk om self vorentoe te gaan. Miskien verloor julle ’n kind deur die dood, ’n gesinslid word in ’n ongeluk vermink, of een van julle verloor sy werk. Hierdie rampe voel soms só erg dat jy wil handdoek ingooi. Baie egskeidings is die regstreekse gevolg van hierdie tipe huwelikskrisisse.
Paulus skryf oor krisistye in sy eie lewe aan die gemeente in Korinte, máár getuig dan ook: Hierdie dinge het juis gebeur sodat hy kon besef dat ’n mens nie op homself kan vertrou nie, maar net op God. Wanneer Paulus tot hierdie gevolgtrekking kom, raak hy rustig. Hy kyk nie meer na sy probleme nie, maar na God wat alles vir sy kinders ten goede kan laat uitwerk – ook die mees onwaarskynlike dinge. Wanneer daar ’n krisistyd in jou eie huwelik opduik, skep gerus moed. Hierdie stuk swaarkry het dalk juis na jul kant toe gekom sodat julle saam sal leer om nóg vaster op God te vertrou. “Op Hom is ons hoop gevestig: Hy sal ons ook verder red,” getuig Paulus in vers 10. Vestig gerus jul hoop op die Here wanneer daar krisisse in die huwelik opduik. Vertrou op God vir oplossings, Hy is almagtig en volkome in staat om julle te help óók in daardie omstandighede wanneer julle self nie ’n tree verder kan nie.
Hemelse Vader, ek loof U dat wanneer ek aan die einde van my eie krag gekom het, ek nog maar aan die beginpunt van u krag is. Dankie dat swaarkry my leer om op U te vertrou.
Amen
27 Februarie
Verwag nét die beste van mekaar
Lees 1 Korintiërs 13:1-13
Die liefde […] soek nie sy eie belang nie, is nie liggeraak nie, hou nie boek van die kwaad nie […] Dit bedek alles, glo alles, hoop alles, verdra alles – 1 Kor 13:4-7
Wanneer jy gedurig vir jou kinders vertel hoe stout óf hoe soet hulle is, is daardie kinders se gedrag dikwels in ooreenstemming met jou opinie van hulle. Dieselfde is waar van jou huweliksmaat. Wanneer jy hom gedurig wantrou, wanneer jy die slegste van hom verwag, moet jy nie verbaas wees as hy jou teleurstel nie! Gelukkig is die teenoorgestelde óók waar – wanneer jy in jou huwelik die liefde van 1 Korintiërs 13 uitleef, gaan jou man jou vir seker verras deur vir jou dié man te wees wat jy graag wil hê.
Daar is egter ’n paar voorwaardes: Jy sal gewillig moet wees om sy belange eerste te stel; jy sal moet ophou om so liggeraak te wees en so noukeurig boek te hou van alles wat hy verkeerd doen. Dan behoort jou huweliksliefde ’n sluier te trek oor alle negatiewe dinge in jou huwelik en sal jy dit kan regkry om alles wat goed is van jou man te glo, te hoop dat dit elke dag net beter met jul huwelik sal gaan en bereid wees om alles te verdra – ook dié dinge waarvan jy nie hou nie. Probeer dit en kyk net watter groot positiewe verskil dit in jul huwelik gaan maak.
Hemelse Vader, sal U my asseblief help om my man lief te hê met die bloudruk wat U self in 1 Korintiërs 13 daargestel het. Gee dat my liefde nooit sy eie belang sal soek nie, nie liggeraak sal wees nie, maar alles sal bedek, glo, hoop en verdra.
Amen
28 Februarie
Sê éérste jy’s jammer!
Lees Jeremia 42:19-22
Toe sê Jeremia vir hulle: “Weet vir seker, ek waarsku julle vandag, julle maak ’n fout!” – Jer 42:19-20
Jeremia is hier besig om ’n ernstige waarskuwing aan die volk te rig: Hulle mag nie na Egipte toe gaan soos hul voorneme is nie, dit sal ’n groot fout wees. Ongelukkig luister die volk nie na die profeet se waarskuwing nie, met noodlottige gevolge.
Juis ómdat ons sondig is, maak ons almal foute. Ons behoort hierdie foute voor God te erken, maar dit sal goed wees as ons ook in ’n huweliksituasie bereid is om ons foute te erken en ons huweliksmaat te vra om ons daardie foute te vergewe.
In die bekende fliek Love Story is daar ’n baie beroemde aanhaling: “Love is never having to say you are sorry.” Ek stem nie hiermee saam nie. Die teenoorgestelde is eerder waar. Hoe makliker jy dit kan regkry om jou foute te erken en jou maat om verskoning te vra as jy ’n fout gemaak het, hoe gelukkiger gaan jou huwelik wees. Een van die heel moeilikste dinge in ’n huwelik is om jou foute te erken en éérste te sê dat jy jammer is – sónder om ’n “maar” agteraan die verskoning te voeg!
God verwag van jou om verskoning te vra selfs al is jy nie die skuldige persoon nie. Onenigheid tussen twee partye benadeel altyd jou verhouding met Hom. Vra dus vergifnis vir jou foute en leer daaruit, want ’n fout is net ’n fout as jy nie daaruit kan leer nie. Pas ook op dat jy nie dieselfde fout twee keer maak nie.
Here, ek is so traag om verskoning te vra – vir U en vir my huweliksmaat. Help my om my foute te bely, te laat staan en uit hulle te leer.
Amen
29 Februarie
Sonder liefde kan dit nie!
Lees 1 Korintiërs 13:1-13
En nou: geloof, hoop en liefde bly, hierdie drie. En die grootste