Tuiste in eie taal. J.C. Steyn

mens nie voorspel nie. Modernisering bevorder die internasionale tale ten koste van kleineres, maar terselfdertyd bied die oplewing van etnisiteit ’n moontlikheid tot die groei van kwynende tale.

      Het die moderne tyd bepaalde faktore wat die groei en agteruitgang van tale veroorsaak, uitgeskakel? Wat van politieke en militêre mag? Dié het nie onbelangriker geword nie, maar selfs belangriker. Die moderne staat het ’n al groter invloed op die burgers. Ons kry al meer te doen met staatsinstellings. Ons luister en kyk radio en televisie, wat in die oorgrote meerderheid lande onder staatsbeheer staan. Militêre en politieke magteloosheid is vir ’n taalgemeenskap gevaarliker as ooit.

      Ekonomiese mag? As ’n gemeenskap so arm is dat hy byvoorbeeld nie uitgewerye het vir sy boeke en ander publikasies nie, moet hy kultureel kwyn. Dit kos eindeloos meer as vroeër om ’n koerant te begin en daarmee vol te hou en boeke uit te gee. ’n Arm gemeenskap kan nie private skole stig om, indien nodig, onderwys deur medium van dié taal te gee as die taal verbied sou word in staatskole nie.

      Die kulturele instellinge het hul groot invloed behou en selfs vergroot. Die stryd van klein tale het moeiliker geword. En hulle sal alleen behoue bly as sprekers vasbeslote en onversetlik vasbyt om te verhoed dat hul tale nie uitgeskakel word nie.

      AFDELING B

      Afrikaans: weerstand en groei