RONDSPRING IN DIE KERK?
Daarna het hy saam met hulle in die tempel ingegaan terwyl hy geloop en gespring en God geprys het (3:8).
GESELSVRAAG: Hoe moet ’n mens jou in die kerk gedra?
“Kom jy uit ’n gemeente waar mense hul hande in die lug steek terwyl hulle die Here loof? Dankie vir al die hande. Wie kom uit ’n gemeente waar dit nie gedoen word nie? Dankie vir al die hande,” lag die spesiale jeugprediker by ’n saamtrek van duisende jong mense. Daardie aand kon ons sien hoe die jongmense vry voel om nie net hul hande op te steek nie, maar ook rond te spring op die maat van die aanbiddingspan se musiek.
Die verlamde man sou geen probleem hê om saam met hulle die Here te loof nie. Ons lees dat hy, wat nog nooit in sy lewe kon loop nie, loop en spring en God prys. Hy is nog nooit in die tempel toegelaat nie, want hy was gestrem. Nou kon hy met vrymoedigheid die tempel ingaan, nie bewerig met ander se hulp of met krukke nie, maar hy loop en spring. Niemand by die tempel kon twyfel dat God ’n wonderwerk in sy lewe gedoen het nie.
Ons is van kleins af geleer om in die kerk stil te sit en nie te lag nie. Daarom voel baie van ons onseker as daar deesdae dikwels ’n ander atmosfeer heers. Daarbenewens stem baie jong mense met hul voete waar hulle meer tuis voel.
GEBED: Here, vul my hart met u vreugde en help my om nie skaam te wees om my vreugde met ander te deel nie.
Lees vanaand in Handelinge 3:11-16 hoe Petrus die geleentheid gebruik om die mense meer van Jesus te vertel.
SONDAG 5 MAART 2017 Lees eers Psalm 119:145-152
GEHOORSAAM DIE WOORD
Ek roep na U, red my, ek wil u verordeninge gehoorsaam (119:146).
GESELSVRAAG: Wat wil die Here dalk vandag in jou lewe verander?
“Het jy dalk vanoggend gebid dat die Here tog niks in jou lewe moet verander nie? Of is jy gewillig om te verander?” daag ek ’n gemeente uit wat my as prediker genooi het. Die Here gee tog sy woord aan ons omdat ons nie volmaak is nie. Ons almal moet verander. Die Here wil ons in die erediens toerus vir die week wat voorlê. Dit beteken Hy wil ons verander sodat ons gereed kan wees vir die uitdagings wat wag.
Die psalmdigter was bewus daarvan dat God verandering by ons verwag. Daarom stel hy hom daarop in om God se Woord te ontvang. Hy begin reeds voor sonop en maak hom gereed (vgl. v. 147). Hy lê in die nag wakker en dink na oor die Woord (vgl. v. 148). Hy weet dat God ons sekerheid wil gee oor wat reg en wat verkeerd is (vgl. v. 152).
Die meeste van ons sal vandag geleentheid kry om na die Woord van die Here te gaan luister. Ons moet dus gewillig wees om nie net ’n preek aan te hoor nie, maar om daardeur radikaal verander te word. Kom ons bid dus vir ons predikers wat vandag voor ’n gemeente sal staan, dat hulle toegerus en bekragtig sal word en dat die Woord van die Here baie mense sal verander.
GEBED: Here, ek buig voor U om vandag deur U verander te word. Help my om u opdrag te hoor.
Lees vanaand in Psalm 119:153-160 hoe die Woord van die Here die geheim van ware lewe is.
MAANDAG 6 MAART 2017 Lees eers Handelinge 3:17-26
DIT IS VIR JOU OOK!
Die dinge waarvan die profete gepraat het, is vir julle bedoel, en julle het deel aan die verbond wat God met julle voorvaders gesluit het (3:25).
GESELSVRAAG: Hoekom wil die Here ons seën?
“Ek sal jou seën … en jy moet tot ’n seën wees” het die Here vir Abraham gesê. In Genesis 12:2, wat Petrus hier aanhaal, word die seën uitgebrei om ook Abraham se nageslag in te sluit. Ons geestelike groei raak ook ons nageslag. Wonderlik!
Net soos in sy eerste preek trek Petrus getrou sy net in om soveel mense moontlik in die koninkryk in te bring. Die toeskouers moet deelnemers word. Al was hulle verbondskinders, moes hulle by bekering begin (vgl. v. 19). Tog moet hulle besef dat Jesus nie net vir die Jode gekom het nie. Al die nasies moet die boodskap hoor (vgl. v. 25). Daarom moet ons eers by onsself begin. Die Here begin deur die verbondskinders eerste na Hom te roep (vgl. v. 26). Dan wil Hy ons uitstuur met die goeie boodskap, na almal wat nog buite is.
Die woord wat hier met “nakomeling” vertaal word, is letterlik “saad”. Die kan dus na ’n individu (Jesus) verwys, of na ’n groep mense (gelowiges). Alle gelowiges is nakomelinge van Abraham (vgl. Gal 3:29). Op watter maniere is jy en jou familie ’n seën vir al die volke van die aarde?
GEBED: Here, dankie dat U ook ons hele familie wil gebruik om die mense van alle nasies tot seën te wees. Wys ons hoe.
Lees vanaand in Handelinge 4:1-4 hoe Petrus se preek goeie en slegte resultate gelewer het.
DINSDAG 7 MAART 2017 Lees eers Handelinge 4:5-12
GEEN ANDER NIE
Daar is geen ander naam op die aarde aan die mense gegee waardeur God wil dat ons verlos moet word nie (4:12).
GESELSVRAAG: Hoe verskil Jesus van ander godsdiensleiers?
“Hoe kan julle Christene so vermetel wees om te dink dat net julle die waarheid beet het?” vra ’n aggressiewe student in ’n vergadering. Al die ander godsdienste het tog ook leiers en heilige boeke. Wat maak Jesus so anders? Ja-nee, wat Petrus hier sê, word vandag glad nie as polities korrek beskou nie. Alle godsdienste is mos gelyk. Almal het iets van die waarheid beet, nie waar nie?
Die vraag is egter: Wat is die waarheid? Was (is) Jesus werklik God wat aarde toe gekom het? As dit nie waar is nie, hoef ons mos nie vir ons aan Hom te steur nie. Maar as dit waar is, moet ons regop sit en mooi luister wat die Bybel sê. As enige ander godsdiens ook waar is, was Jesus ’n leuenaar (vgl. Joh 14:6). Dan was al die apostels ook leuenaars. Hoe kan ons ’n klomp leuenaars volg? Tog kan al die godsdienste nie waar wees nie, want hulle weerspreek mekaar. Jesus daag ons dus uit om gewillig te wees om God te gehoorsaam, dan sal ons die waarheid weet (vgl. Joh 7:17).
Ek en jy ervaar dikwels twyfel. Selfs teoloë word nie gespaar nie. Dit is doodnatuurlik. Daarom moet ons elke dag tyd maak vir die Bybel. Die Here wil Hom aan ons bekend stel soos Hy werklik is. Geniet dit.
GEBED: Here Jesus, ek glo dat U die enigste persoon is wat my kan red. Help my om die goeie nuus vandag ook met ander te deel.
Lees vanaand in Handelinge 4:13-22 hoe die apostels se vrymoedigheid hul vyande verstom het. Joune ook?
WOENSDAG 8 MAART 2017 Lees eers Handelinge 4:23-31
VRYMOEDIGHEID
Hulle is almal met die Heilige Gees vervul en het met vrymoedigheid die woord van God verkondig (4:31).
GESELSVRAAG: Wat is vir jou swaar om te doen?
“Hoe is dit dat julle twee ekstroverte met mekaar getrou het?” vra ’n tannie in Kanada vir ons een seun op ’n konferensie waar hulle albei sprekers was. Dit het hom baie binnepret besorg, want hy en sy Sjinese vrou is albei introverte. Sedert hy as tegnikus in die sending gekom het, het die Here sy lewe omgekeer sodat hy dit nie meer moeilik vind om in die openbaar te praat nie. Sy vroutjie word dikwels as internasionale spreker genooi.
Die apostels word deur die godsdienstige leiers belet om oor Jesus te praat. Dan roep hulle die gemeente bymekaar om oor dié ernstige bedreiging te bid. Het dit jou ook getref dat die apostels nie, soos ons sou doen, vir beskerming gebid het nie? Kyk mooi: Hulle bid vir vrymoedigheid. Daarna word hulle opnuut deur die Heilige Gees vervul en kon hulle met vrymoedigheid die woord van God verkondig. Dit het nie vir hulle oor hul persoonlike veiligheid gegaan nie, maar oor die uitdra van die evangelie aan almal wat dit nodig gehad het.
Jy hoef dus nie bang te wees as jy voel die Here roep jou om iets te doen nie. Saam met die roeping gee Hy ook die toerusting wat jy sal nodig hê. Wees net gewillig om te gaan.
GEBED: Here, dankie dat U ook vir my werk in u diens het.
Lees vanaand