Baie gemeentes kry in ons tyd swaar om te oorleef. Is dit dalk dat ons ook, soos die gelowiges van wie ons gelees het, bloot saamgekoek en mekaar warm gebroei het? Ons opdrag is om oor alle grense heen uit te reik met die goeie nuus van Jesus. As ons nie wil gehoorsaam nie, moet die Here dalk ’n ander plan maak.
GEBED: Here Jesus, hou ons getrou aan ons roeping om die evangelie na alle nasies uit te dra.
Lees vanaand in Handelinge 8:5-8 hoe die evangelie oor volksgrense gespring het.
SONDAG 19 MAART 2017 Lees eers Psalm 120:1-7
ONREG
Ek het vrede begeer, maar sodra ek iets gesê het, was hulle op oorlog uit! (120:7).
GESELSVRAAG: Wie is vir ons ’n bedreiging?
“Toe hierdie mense in die nood was, het ons hulle met liefde in ons lande verwelkom. Nou bedank hulle ons deur ons aan te val, te beroof en dood te maak!” kla ’n immigrant uit een van die Afrikalande. Die vreemdelingehaat wat telkens in ons land opvlam, is ’n skande vir ons land. Mense uit baie lande, ook dié wat vir die evangelie gesluit is, kom na Suid-Afrika op soek na ’n beter lewe. Maar in plaas van met die liefde van Christus verwelkom te word, maak hulle kennis met die grootste onreg en geweld.
Hierdie psalm is een van die pelgrimsliedere. Dit is bedoel om te sing wanneer jy op pad is, veral op pad na Jerusalem. Die psalmdigter vertel hier hoe hy in ’n ander land gaan woon het en toe daar sleg behandel is. Daarom is hy eerder op pad na Jerusalem.
Hier op aarde kan ons vervolging en onreg verwag, veral as ons getrou is om die evangelie met ander mense te deel. Miskien wil hierdie psalm ons daaraan herinner dat ons nog op pad is na ons eintlike tuiste – die Nuwe Jerusalem. Daar sal dinge anders wees, want God is daar. Ons skrik dus nie vir dreigemente en onreg nie. Dit is net tydelik.
GEBED: Here, dankie dat U steeds by my is wanneer ek bang en alleen voel.
Lees vanaand in Psalm 121:1-8 waar ons hulp kan gaan soek wanneer ons bang en alleen voel.
MAANDAG 20 MAART 2017 Lees eers Handelinge 8:9-17
ONVERWAGTE VRUG
Selfs Simon het gelowig geword … Hy was verstom oor die groot tekens en kragte wat hy sien gebeur het (8:13).
GESELSVRAAG: Wie sal waarskynlik nie tot bekering kom nie?
“Selfs drie toordokters het tot bekering gekom,” skryf ’n sendeling in sy nuusbrief. Hulle was aanvanklik sy groot teenstanders, maar God se genade is so groot dat Hy ook in hul hart gewerk het. Ons moet nooit dink dat iemand te sleg is om gered te word nie.
Simon was blykbaar ’n kulkunstenaar wat die mense van Samaria mislei het. Hy het die mense met allerhande goëltoertjies oortuig dat hy “Die Groot Krag van God is” (vgl. v. 10). Hy het die mense met sy toorkunste verstom (vgl. v. 9). Toe Filippus egter daar aankom en die evangelie verkondig, het baie mense gelowig geword. Selfs Simon, wat ander mense verstom het, was verstom toe hy sien hoe God se krag in en deur Filippus werk (vgl. v. 13). Hy het ook tot geloof gekom en oral saam met Filippus gegaan. Hy het besef dat wat hy sien, nie goëltoertjies was nie, maar die ware Jakob. Dít was veel beter as enigiets wat hy kon voorgee om te doen.
In ons tyd is daar baie misleiers aan die werk. Sommige mislei mense om deur hul liggelowigheid hul geld verkeerd te belê of dom dinge aan te vang. Ander smous toorgoed wat sukses sal verseker, of sweep mense op. Baie word ryk uit dwelmhandel. Tog kan selfs so iemand ook gered word. Moenie hulle oorslaan nie.
GEBED: Here, ek bid vandag vir al die verleiers wat in ons land bedrywig is. Vergewe hulle, en red hulle uit genade.
Lees vanaand in Handelinge 8:18-25 hoe iemand uit onkunde kan dink dat God se gawes gekoop kan word.
DINSDAG 21 MAART 2017 Lees eers Handelinge 8:26-31
Menseregtedag
LUISTER!
Gaan loop saam met daardie wa (8:29).
GESELSVRAAG: Hoe kan ons Menseregtedag reg gebruik?
“Ek het die eerste skoot afgetrek tydens die Sharpeville-slagting,” bely ’n oudpolisieman van Springs. Hy vertel van sy vrees daardie dag en dat hy ná al die jare steeds nagmerries kry van ’n horde swart mense wat op hom afstorm. Hy trek sy hemp op en wys waar hy homself in ’n selfdoodpoging geskiet het.
Filippus het die kuns aangeleer om mooi na die Heilige Gees se stem te luister. Miskien het hy gewonder of hy reg gehoor het toe hy hoor hy moet op die middag suid van Jerusalem langs ’n stil pad gaan sit. Dit het beteken dat hy die wonderlike herlewing in Samaria moes verlaat. Kan dit reg wees? Toe kom ’n lang, slap Mercedes-ossewa daar verby met Etiopië se minister van finansies daarop. Filippus hardloop toe hy die volgende opdrag kry, en kom by die wa aan net toe die minister die vers uit Jesaja wat na Jesus verwys, hardop lees. Wat ’n wonderlike aanknopingspunt!
Die vierings vandag sal weer wys dat ons nog nie gereed is om na mekaar te luister nie. Kom ons probeer mekaar regtig verstaan. Maar boweal, kom ons luister na wat die Heilige Gees vandag aan ons almal wil sê. Hy het ’n manier om die mense van Suid-Afrika te verenig. Net Hy kan dit doen.
GEBED: Here, vandag wil ek hoor wat U vir my sê. Help my om na mense te luister wat van my verskil.
Lees vanaand in Handelinge 8:32-40 hoekom die Etiopiese minister met vreugde terugreis na Afrika.
WOENSDAG 22 MAART 2017 Lees eers Handelinge 9:1-9
SOOS ’N BESETENE
Intussen het Saulus soos ’n besetene voortgegaan om die volgelinge van die Here met die dood te dreig (9:1).
GESELSVRAAG: Wanneer is dit swaar om te erken dat jy verkeerd is?
“Kom ons begin almal op dieselfde bladsy. Neem ’n vel papier, skryf daarop: ‘God is dood’. Dan teken jy dit en gee dit vir my in,” beveel die ateïstiese professor die eerstejaarsklas. Een jong man het geweier. Op die ou end blyk dit dat die professor God haat omdat sy ma aan kanker dood is. Die student kon hom help insien dat jy nie iemand kan haat wat nie bestaan nie.
Saulus het ’n goeie opleiding gehad, as Fariseër én in Grieks. Daar was ’n groot universiteit in sy tuisdorp. Nou het hy onder prof Gamaliël kom studeer. Hy wou naam maak. Daarom bestry hy hierdie nuwe dwaling met groot ywer. Tog klop iets nie. Sy vooropgestelde idees oor die nuwe beweging en die mense wat vervolg word, laat hom weer dink. Stefanus se gesig bly hom by. Is dit ’n goddelose mens? Hy bid dan vir sy vyande? Saulus probeer die stem van sy gewete stilmaak deur nog yweriger te vervolg. Maar God was op sy spoor.
Die mense wat die aktiefste teen God werk, weet goed dat Hy bestaan. Hulle probeer Hom seermaak deur sy kinders seer te maak. God se liefde is egter baie groter as dit. Hy maak van Saulusse Paulusse.
GEBED: Here, ek bid vandag vir elkeen wat u kinders vervolg en seermaak. Maak hulle getuies van u genade.
Lees vanaand in Handelinge 9:10-16 hoe die Here sy kinders roep en na die mees onwaarskynlike mense stuur.
DONDERDAG 23 MAART 2017 Lees eers Handelinge 9:17-19a
GEBEDSVERHORING
Saul, broer, die Here Jesus wat aan jou verskyn het toe jy op pad hierheen was, het my na jou toe gestuur … (9:17).
GESELSVRAAG: Waaroor het jy al getwyfel? En toe?
“Ons het in een van die mees geslote lande gery met ’n vrag Bybels in ons motor. In ’n bergpas staak die enjin skielik en die kar gaan staan. Toe ons uitklim om te kyk wat verkeerd is, staan ’n man wat eenkant onder ’n boom gesit het, op en vra: ‘Is julle die manne met die boeke?’ Hy vertel toe