Lees vanaand in Deuteronomium 29:14–29 wat die gevaar is vir iemand wat in sonde volhard en nogtans dink hy kan gered word.
Dinsdag 14 Februarie
Lees Deuteronomium 30:1–10.
God verander mense
Die Here jou God sal jou lewe en die lewe van jou nageslag aan Hom wy, sodat jy Hom sal liefhê met hart en siel. Dan sal jy lewe (Deut 30:6).
“God laat U-draaie toe,” lees ek op ’n kennisgewingbord langs die pad. En dit is tog die kenmerk van ware bekering. As jy op die verkeerde pad is, moet jy betyds omdraai. Toe ons laas in Wallis getoer het, het ’n Suid-Afrikaner haar GPS aan ons geleen sodat ons nie moet verdwaal nie. Die vriendelike vroue-stem het ons elke keer gesê watter afdraai om te neem. As ons moedswillig agter ons eie neus aanry, het sy binne sekondes weer ’n ander roete bereken sodat ons tog by ons bestemming kon uitkom. Maar soms het ons in ’n doodloopstraat beland. Dan het sy knaend gesê: “Make a U-turn NOW!” tot ons dit gedoen het.
God praat in vandag se Skrifgedeelte nog steeds met die volk Israel deur sy mondstuk, Moses. Hy weet reeds dat die volk nie die wet gaan onderhou nie. Hulle sal dan onvermydelik die gevolge van so ’n dwase keuse moet dra. Hulle sal oorwin word en as slawe weggevoer word. Maar selfs in die vreemde sal God nog steeds met hulle besig wees. Hy sal hulle aanmoedig om om te draai. En wanneer hulle dit doen, sal Hy hulle weer terugbring. En, soos ons teksvers ons vandag herinner, is dit net Hy wat ons hart regtig kan verander.
Het jy al by die U-draai gekom? Daar is nog tyd om dit vandag te doen. Van môre is ons nie so seker nie. Erken jou swakheid aan die Here, en laat Hom toe om jou te verander.
GEBED: “Here, dankie dat U ons toelaat om om te draai as ons op die verkeerde pad is. Ek wil dit heelhartig doen.”
Lees vanaand Deuteronomium 30:11–20 en vergelyk dit met Romeine 10:6-10. Dis die geheim van geloofsekerheid!
Woensdag 15 Februarie
Lees Deuteronomium 31:1–8.
Nooit alleen nie
Die Here sal voor jou uit gaan. Hy sal by jou wees. Hy sal jou nie in die steek laat nie, jou nie alleen laat nie. Moenie bang wees nie, moenie skrik nie (Deut 31:8).
“Hoe berei jy mense voor vir groot veranderings?” Ons almal worstel die een of ander tyd met hierdie vraag. Elke keer as ons moet verhuis, of as die kinders na ’n ander skool moet gaan, of as daar veranderings in die bestuur of eienaarskap van ons firma is, of as ’n nuwe bestuurder in jou departement oorneem. Dit is vir almal ’n tyd van groot stres, en veral as dit kan beteken dat jy jou werksekuriteit verloor. Regstellende aksie en rasionalisasie het baie van ons al seer gebyt.
In vandag se gedeelte is Moses besig om die volk – en vir Josua – voor te berei vir ’n dramatiese verandering. Moses sal nie langer die leier kan wees nie. Hulle sal in die vervolg sonder hom moet klaarkom. Dinge waarop hulle die afgelope veertig jaar staat gemaak het, val nou weg. Wat hou die toekoms vir hulle in, veral met die groot uitdagings wat voorlê? Moses wys die volk daarop dat die Here nie verander nie, en dat Hy nog steeds in beheer is (v 5). En hy bemoedig die nuwe leier ook deur hom te verseker dat die Here by hom sal wees, en dat hy nie hoef te vrees nie (v 8).
Dit kan wees dat jy vandag ook onseker voel oor dinge wat buite jou beheer is. Jy weet nie wat om te verwag nie. Moenie bang wees nie – die Here het reeds voor ons uitgegaan, en ons moet Hom net volg. En dit geld ook vir die dag wanneer ons elkeen sal moet oorstap na die ewigheid.
GEBED: “Dankie dat U nooit verander nie, Here. Ek wil hierdie dag, en elke dag, agter U aan gaan. Lei my en help my.”
Lees vanaand in Deuteronomium 31:9–13 hoe die volk die wet elke sewe jaar moes hoor, omdat hulle nie Bybels gehad het nie.
Donderdag 16 Februarie
Lees Deuteronomium 31:19–30.
Wie hou ons op die regte pad?
Ek weet julle sal na my dood julle ondergang soek deur te verontagsaam wat ek julle beveel het (Deut 31:29).
“Sedert Pa oorlede is, het ons hele familie sommer uitmekaargeval. Dit is asof sy gebede ons almal bymekaargehou en gedra het,” vertel ’n vriendin. Sommige van haar broers het geskei, en ander het openlik hulle ongeloof verklaar. Die een ding ná die ander het verkeerd geloop, en daar was groot ongelukkigheid. Miskien kan jy self ook van sulke ervarings getuig.
Moses het ook besef dat hy self die persoon was wat die volk op die pad van die Here gehou het. Noudat hulle die vryheid gaan hê om self te kies, gaan die meeste van hulle verkeerd kies. Hulle het nog nie ’n persoonlike verhouding met die lewende God gehad, soos Moses self, nie. Daarom sal hulle fondamente maklik wankel as die toetse kom. Moses het dus ’n lied gedig wat hulle gereeld moes sing. Dit sou hulle herinner aan die Here, sodat hulle sal weet dat hulle weer na Hom toe kan terugkom as hulle sien wat die gevolge van hulle dwaling is.
“Sondagoggende gaan ons as gesin almal saam kerk toe, maar Sondagaande kan julle self besluit of julle saam met ons wil gaan,” het ons aan ons kinders toegegee. Ons wou hulle die geleentheid gee om self reg te kies. En hulle het! (Met deesdae se Tekkiedienste is dit die kinders wat hulle ouers dwing om Sondagaande saam kerk toe te gaan!) Dit is nie maklik om ons kinders die vryheid te gee om foute te maak nie, maar dit is nodig dat hulle sal leer om self reg te kies. Ons moet hulle vir die lewe help voorberei.
GEBED: “Here, help ons om self elke dag reg te kies, en om ons kinders en kleinkinders ook daarmee te help.”
Lees vanaand in Deuteronomium 32:1–10 die eerste deel van die lied wat ons aan die Here se sorg moet herinner.
Vrydag 17 Februarie
Lees Deuteronomium 32:11–18.
Op pad na volwassenheid
“Soos ’n arend wat sy kleintjies uit die nes uitskop, oor hulle fladder en hulle vang op sy vlerke wat hy oopsprei, soos ’n arend wat sy kuikens op sy vlerke dra …” (Deut 32:11).
“Hoe berei ek my kinders vir die lewe voor?” is ’n vraag wat menige ouer kwel. Sommige wil hulle teen die lewe beskerm, laat hulle toe om enigiets aan te vang, kies agterna die kind se kant en betaal die skade. Die kind leer nooit verantwoordelikheid nie. Ander laat die kinders leer om self verantwoordelikheid te neem vir hulle dade. Dit leer hulle selfbeheersing en versigtigheid.
In Moses se afskeidslied neem hy die arende as voorbeeld. In die begin versorg die ouers die kleintjies en gee hulle alles wat nodig is. Die kleintjies sal graag vir die res van hulle lewe sit en kyk hoe alles vir hulle aangedra word. Maar daar kom ’n tyd wanneer die kleintjies moet leer vlieg en vir hulleself sorg. In die begin is hulle bang, want die neste is op hoë kranse gebou. Maar as die ouers die kleintjie uitskop en hulle paniekbevange begin fladder, bly die ouers die hele pad by en duik onder hulle in om hulle te vang en weer na die nes toe terug te neem. So het die Here die volk Israel uit Egipte “geskop” en hulle deur die wildernis gelei om hulle sterk te maak. Maar die Here was die hele pad by hulle, en het keer op keer voorsien wanneer hulle in die nood was.
Ons moet dus nie skrik as dinge soms moeilik gaan nie. Die Here het ons nie verlaat nie – Hy wil ons geloof net ’n bietjie rek. Vertrou Hom, en wees gewillig om te groei.
GEBED: “Here, ek is bang om buite my gemaksone te beweeg. Maar ek vertrou U om my deur hierdie ervaring sterker te maak.”
Lees vanaand in Deuteronomium 32:19–28 oor die tragiese gevolge as iemand sy rug op die Here keer.
Saterdag 18 Februarie
Lees Deuteronomium 32:29–35.
Dink vooruit
As hulle wysheid gehad het, sou hulle dit verstaan het, sou hulle begryp het wat hulle uiteinde sal wees