Lees Handelinge 3:11–16.
Glo in die lewende Jesus
“Die geloof wat van Hom kom, het die man volkome herstel, hier voor julle almal” (Hand 3:16).
“Nie aan ons nie, Here, nie aan ons nie, maar aan u Naam kom die eer toe, want dit is U wat liefde en trou bewys” (Ps 115:1). Dit is die gesindheid wat ons ook hier by Petrus kry. Net soos Paulus en Barnabas later by Listra gedoen het (Hand 14:14–15), weier Petrus om enige eer vir homself toe te eien. Dit is nie sy eie krag of vroomheid wat die wonderwerk laat gebeur het nie. Dit was geloof (vertroue) wat die lewende Here Jesus alleen kan gee. Petrus wys dus weg van homself af na Jesus toe.
Dit is interessant om op te let dat in die 23 toesprake wat in die boek Handelinge opgeteken is, die onderwerp feitlik sonder uitsondering Jesus se werklike opstanding uit die dood is (Hand 3:15). Dit is die verklaring vir die krag wat daar in die Naam van Jesus opgesluit is: Hy lewe! Hy is nie bloot ’n goeie mens wat ongelukkig doodgemaak is nie. Hy het nie net in die dissipels se gedagtes of verbeelding gelewe nie. Hy leef werklik! En Hy is God. Daarom is niks vir Hom onmoontlik nie.
Daar is deesdae baie mense wat twyfel oor die feit dat Jesus opgestaan het. Hulle kan dit nie wetenskaplik verklaar nie, en glo ook nie meer die getuienis van die ooggetuies soos ons dit in die Bybel opgeteken kry nie. Dit is vir hulle moeilik om die geloofstap te neem “omdat die Bybel so sê”. Maar elkeen wat dit in die geloof gewaag het, se veranderde lewe getuig saam dat Jesus lewe!
GEBED: “Here Jesus, dankie dat U lewe en dat U vandag nog mense se lewens totaal verander.”
Lees vanaand in Handelinge 3:17–26 hoekom verbondsmense hulle moet bekeer, sodat hulle vir alle volke tot seën kan wees.
Vrydag 2 Maart
Lees Handelinge 4:1–10.
Goed doen is gevaarlik
“Deur watter krag en in wie se naam het julle dit gedoen?” (Hand 4:7).
“Hoe is dit moontlik dat jy gearresteer kan word en die nag in die tronk moet slaap, nie omdat jy iets verkeerds gedoen het nie, maar omdat jy iemand gehelp het?” wonder jy seker ook. Ja-nee, Christen-wees is nie vir sissies nie, en sodra jy voluit vir Christus begin lewe, sal jy vervolg word (2 Tim 3:12). Petrus en Johannes gee vir ons die toon aan, en stel vir ons die voorbeeld van hoe gelowiges in sulke omstandighede moet optree.
Dit is tragies dat die grootste weerstand juis van die kerkleiers van daardie tyd kom. Hulle wou Jesus nie erken as die ware Messias nie, en daarom moes hulle wal gooi teen enige bewys dat hulle verkeerd is. En kyk net hoe dapper antwoord Petrus hulle. Pinkster het regtig hierdie visserman se lewe verander. En sy moedige getuienis laat die kerk dramaties groei, tot vyf duisend binne ’n paar dae (Hand 4:4). En weer eens getuig Petrus dat Jesus regtig lewe (v 10). Dit is wat Jesus so anders maak as enige ander godsdienstige leier. Al die ander is dood en begrawe. Net een se graf is leeg: Jesus s’n. Daarom kan Petrus met groot vrymoedigheid bevestig dat daar geen ander Naam is waardeur ons gered kan word nie: net Jesus s’n (v 12).
Deesdae is dit mode om te sê dat alle godsdienste gelyk is, en dat een nie beter is as ’n ander nie. Maar is dit waar? As wat Petrus hier getuig, waar is, kan die ander mos nie ook waar wees nie. Iewers sal ons ’n keuse moet maak. Wie praat die waarheid? En as ons vir die waarheid kies, kan ons teenstand en vervolging verwag. So was dit nog altyd in die Christelike kerk. Wat kies jy?
GEBED: “Here, help my om vir die waarheid te kies. Dankie dat u Woord se getuienis so duidelik is.”
Lees vanaand in Handelinge 4:11–22 oor die uniekheid van Jesus en Petrus se vreeslose verkondiging daarvan.
Saterdag 3 Maart
Lees Handelinge 4:23–31.
Bid vir vrymoedigheid
“En nou, Here, kyk hoe dreig hulle ons. Gee dat u dienaars met volle vrymoedigheid u woord sal verkondig” (Hand 4:30).
“Wat doen ’n mens as jy teenstand en vervolging oor jou geloof in Christus ervaar?” Ons sien dat die eerste gemeente bymekaarkom om te bid. In sulke omstandighede sou ons dit seker ook gedoen het. Waarvoor het hulle gebid? Vir beskerming, soos ons waarskynlik sou doen? Nee, glad nie – hulle bid vir meer vrymoedigheid om die goeie nuus vreesloos met almal te deel! Hulle was totaal uitverkoop aan die Here Jesus, en gewillig om vir Hom te sterf, soos Petrus destyds in sy swakheid belowe het (Matt 26:35).
Let op na hulle gebed: Hulle haal dikwels uit die Ou Testament aan om te bevestig dat die Here die Almagtige is. Hulle besef dat hierdie bedreigings wat hulle ervaar, niks nuuts is nie. Die profete van destyds het dit voorspel en self ervaar. En die gemeente was oortuig dat alles wat die vorige weke gebeur het, maar net deel was van God se groot plan om sondaars te red. God is nie onverhoeds betrap nie. Hy is nog steeds ten volle in beheer! Daarom kon hulle bid vir vrymoedigheid te midde van soveel dreigemente. En God verhoor sulke gebede, soos ons vanaand sal sien.
Dieselfde drie-enige God wat daardie dag in Jerusalem aan die werk was, werk vandag nog. Ons kan dus ook teenstand van die mees onverwagte oorde verwag. Maar ons moet nie daarvoor bang wees nie. Ons het ’n boodskap wat lewens verander. Ons het die beste geestelike wapens waarvan ’n mens kan droom. Dieselfde Heilige Gees wil ons kragdadig vervul en gebruik!
GEBED: “Here, maak my vrymoedig om die waarheid te deel met mense wat U nodig het.”
Lees vanaand in Handelinge 4:32–37 hoe dié gebed dramaties verhoor is, en hoe die herlewing daarna lewens verander het.
Sondag 4 Maart
Lees Psalm 39:1–8.
Derde Lydensweek
Oppas wat jy sê
Ek wil sorgvuldig let op my lewe en nie sondig met wat ek sê nie (Ps 39:1).
“Jy praat twee maal voor jy dink,” het my pa eenkeer vir my gesê nadat ek as tiener iemand deur my onbedagsame woorde baie seergemaak het. En deur die jare het dit baie keer gebeur dat ek mense deur sulke onnadenkende woorde aanstoot gegee het sonder dat ek dit so bedoel het. Dit is veel makliker om maar net stil te bly as om agterna met verskonings en verduidelikings te probeer regmaak wat ek verkeerd gepraat het.
Dit klink in vandag se psalm asof Dawid ook met dieselfde probleem geworstel het. Hy vertel hoe hy hom voorgeneem het om niks te sê nie, maar voor hy hom kom kry, het die woorde uitgeglip. Lees hoe moedeloos hy met homself is. Hy is bewus dat die lewe maar kort is, en dat ons elke minuut – en elke woord – reg moet gebruik.
Dalk is jy ook een van die onvolmaakte mense op aarde wat soms die verkeerde goed sê. Jakobus sê dat sulke woorde soos ’n vuur is wat groot skade aanrig (Jak 3:6). Ons het maar gereeld ’n brandblusser nodig. En juis daarom is dit nodig dat ons saam met ander gelowiges die Here gaan ontmoet – nie om fout te vind of te kritiseer nie, want dan is dit juis die verkeerde plek om te wees, maar om saam te luister na God se Woord en sy wet, sodat ons op ons hoede kan wees. En sodat ons saam die Here om vergifnis kan vra en onsself aan die bestuur van die Heilige Gees kan oorgee, sodat Hy ons die regte, opbouende woorde kan gee.
GEBED: “Vergewe my die verkeerde woorde wat U en my medemense seermaak, Here, en gee my die regte woorde.”
Lees vanaand Psalm 39:9–14 en kyk watter vers jou aan Christus se lyding herinner. Watter vers wil jy bid?
Maandag 5 Maart
Lees Handelinge 5:1–6.
Allesverloren
“Jy het nie vir mense gelieg nie maar vir God” (Hand 5:4).
“Allesverloren” is die naam op ’n hek langs ’n grondpad. ’n Mens wonder dadelik wat die storie agter die naam is. Wat sou in hierdie boer se lewe gebeur het? Watter rampe het hom getref? Wat het toe daarna gebeur?
Die geskiedenis van Ananias en Saffira kan