GEBED: Vader, dankie vir u groot genade wat vir ons sorg. Help ons om u eiendom reg te bestuur sodat u koninkryk kan kom.
Lees vanaand in Deuteronomium 15:1-11 hoe armoede bestry is deur elke sewe jaar alle skuld af te skryf.
DONDERDAG 26 JANUARIE 2017 Lees eers Deuteronomium 15:12-23
BESTRY ARMOEDE
Maar wanneer jy hom vrylaat, moet jy hom nie met leë hande laat gaan nie (15:13).
GESELSVRAAG: Hoe kan ons die armoedespiraal verbreek?
“Dit is feitlik onmoontlik om uit die armoedespiraal weg te breek,” verduidelik iemand wat ’n studie daarvan gemaak het. “Kinders uit so ’n huis ontwikkel nie genoeg nie omdat hulle nie genoeg kos en stimulasie kry nie. Min van hulle voltooi hul laerskoolopleiding. Dit is makliker om hul ouers se voorbeeld te volg en die seer en armoede in alkohol of dwelms te probeer vergeet. Hul eie kinders het dus ook maar weinig hoop op ’n beter lewe.”
Moses se oplossing was dat armes wat hulleself as slawe verkoop het om kos te kry, elke sewe jaar vrygelaat moes word (vgl. v. 12). Hulle moes dan op die been gehelp word sodat hulle hulleself kan onderhou (vgl. v. 13-14). ’n Slaaf mag nie mishandel word nie (vgl. Lev 25:43). Hy mag geld spaar om homself vry te koop (vgl. Lev 25:47-49). ’n Slaaf wat ontsnap het, moet vryheid kry (vgl. Deut 23:15-16). Só wou hulle armoede onder die volk uitroei.
Ons lees dat geen Christene ná Pinkster in Jerusalem gebrek gely het nie (vgl. Hand 2:44; 4:34-35). Die gelowiges het vir mekaar gesorg omdat hulle mekaar leer liefkry het. Die diakens moes toesien dat niemand gebrek ly nie (vgl. Hand 6:1-3). Die optrede wat ons vandag van die staat verwag, is eintlik die kerk se verantwoordelikheid.
GEBED: Here, wys my hoe ek armoede hier kan bestry.
Lees vanaand in Deuteronomium 16:1-12 hoe die Paasfees elke jaar gehou is om die Israeliete aan hul bevryding te herinner.
VRYDAG 27 JANUARIE 2017 Lees eers Deuteronomium 16:13-20
DIE OESFEES
Jy moet bly wees op hierdie fees, jy en jou seuns en dogters, jou slawe en slavinne, al die Leviete, vreemdelinge, weeskinders en weduwees van jou omgewing (16:14).
GESELSVRAAG: Watter feeste word in jul omgewing gehou?
“Ons het opgelet dat julle ook jul voorvadergeeste vereer,” verduidelik ’n Xhosa aan my. “As julle geloftefees hou, doen julle dit in die buitelug. Dan hou julle byeenkomste waar julle die lof van jul voorvaders besing. Julle braai vleis buite, al het julle kombuise in jul huise, sodat die voorvadergeeste dit kan ruik en geniet. Hoe kan julle dan vir ons sê ons doen verkeerd as ons dieselfde doen?” Ons besef nie aldag hoe mense uit ’n ander kultuur ons verstaan nie.
Die Israeliete het elke jaar verskeie feeste gehou. Almal was godsdienstige feeste. Met die Huttefees het hulle met takke skuilings gemaak en daar geslaap, al het hulle huise gehad. Dit moes hulle daaraan herinner dat daar ’n tyd was dat hulle sonder gereelde oeste in die woestyn moes oorleef. Dit was dus meer as net ’n oesfees. Daar was baie om voor dankbaar te wees. Dit was baie soos die Amerikaners se Thanksgiving vandag.
Ons vergeet dat ons ook godsdienstige feeste het wat ons met dankbaarheid moet vier: Kersfees, Paasfees en Pinksterfees. Dit is dus jammer dat ons op dié feesdae meestal die pad vat en ver van ons eie gemeente gaan vakansie hou. Ons verloor so baie.
GEBED: Here, baie dankie dat U soveel vreugde aan ons wil gee. Help ons om elke fees op die regte manier saam met U te vier.
Lees vanaand in Deuteronomium 16:21-17:1 hoe die Israeliete enigiets wat na afgodsdiens kon lyk, moes vermy.
SATERDAG 28 JANUARIE 2017 Lees eers Deuteronomium 17:2-13
RESPEK VIR DIE REGSPRAAK
Die hele volk sal hiervan hoor en bang word om so moedswillig op te tree (17:13).
GESELSVRAAG: Wat is jou ervaring van ons regstelsel?
“Ek is baie teleurgesteld met ons regstelsel,” vertel iemand wat met die onregverdige uitspraak van ’n landdros te doen gekry het, en wat hom op die ou end baie geld gekos het. Die ontstaan van boendoehowe wat mense terstond ter dood veroordeel en teregstel, wys dat daar op voetsoolvlak ook sterk wantroue in die huidige regstelsel is. Die persepsie bestaan dat baie polisiebeamptes eintlik misdadigers is, en die regters korrup. As dit waar is, is daar groot fout. Hoe kan ons dit regstel?
Moses leer die volk dat die regters en amptenare die volk billik moet regeer (vgl. 16:18). Hulle mag nie omkoopgeskenke aanvaar of partydig wees nie (vgl. 16:19). Hulle mag alleen laat geld wat reg is (vgl. 16:20). Ons lees nêrens dat die regters hul wetboeke moet raadpleeg nie. As die saak moeilik is, neem die regter dit na die priesters (vgl. 17:9). Hul uitspraak is finaal. As iemand die priester aan diens minag, volg die doodstraf (vgl. 17:12). Niemand mag die wet in eie hande neem nie. Die volk moet die regstelsel kan vertrou om die regte ding te doen.
Die probleem is dat die landdroste en regters ook maar feilbare mense is. Ons moet dus onthou om gereeld vir hulle te bid.
GEBED: Here, lei ons regters en landdroste om die reg te laat seëvier sodat die misdadigers bang sal wees om te oortree.
Lees vanaand in Deuteronomium 17:14-20 watter opdragte aan die koning gegee is, wat Salomo later oortree het.
SONDAG 29 JANUARIE 2017 Lees eers Psalm 119:65-72
VERANDERING
Voordat ek swaargekry het, het ek gedwaal, maar nou hou ek my aan u woord (119:67).
GESELSVRAAG: Hoe weet ons wat reg en wat verkeerd is?
“Ek is dankbaar dat ek destyds gearresteer is en in die tronk beland het. As dit nie gebeur het nie, sou ek nooit die evangelie gehoor het nie. Dan het die ander bendes my dalk al vermoor,” vertel ’n gevangene wat die Here in die tronk gevind het. In die tronk het hy by die Bybelstudiekring ingeskakel en was in daardie stadium een van die voorgangers. Hy het verstommende Skrifkennis opgedoen. Selfs die bewaarders het respek vir hom gehad.
Hierdie lang lied wat ons elke Sondag saam oordink, wil ons daaraan herinner dat die Woord van God ons op die regte pad wil lei. Ons behoort dit te memoriseer, want as die versoekings kom, het ons selde ’n Bybel byderhand om ons te lei, en selfs dan weet ons nie waar die antwoord staan nie. Toe Jesus versoek is, het Hy die Skrif uit die kop aangehaal, en die versoeker moes vlug.
Ons weet nie watter versoekings hierdie week vir ons wag nie. Daarom behoort ons vandag saam met ander gelowiges die Woord te oordink sodat ons dit hierdie week kan toepas. Ons kan vanmiddag ook tyd maak om ’n Skrifdeel te memoriseer. Dit sal ons gebedslewe radikaal verander en ons help om die regte keuses te maak.
GEBED: Here, ons bid vir elkeen wat vandag die Woord moet bedien. Mag dit met krag wees om lewens om te keer.
Lees vanaand in Psalm 119:73-80 hoe die Woord ons in die alledaagse lewe kan lei.
MAANDAG 30 JANUARIE 2017 Lees eers Deuteronomium 18:1-8
SORG VIR DIE BEDIENAARS
Die priesters kry nie ’n eie grondgebied tussen hulle volksgenote nie, Levi ontvang van wat die Here self toekom (18:2).
GESELSVRAAG: Watter bedienaars het ons ondersteuning nodig?
“Ek het eenkeer ’n Mercedes as ’n winskopie bekom. Dit het egter gemaak dat baie lidmate opgehou het om hul dankoffers te gee, want hulle wou nie dat hul gawes gebruik word om die predikant in weelde te laat leef nie. Die uiteinde was dat ek die motor moes verkoop en ’n baie nederiger karretjie moes aanskaf,” vertel ’n bruin leraar. Selfs vandag kry min van hulle hul volle salaris.
Die Here het toegesien dat die Leviete nie hul eie stamgebied sou kry nie, maar dat hulle verspreid tussen al die ander stamme moes woon sodat hulle die volk oor die Here kon leer. Hy het toe bepaal dat