As ons die eerste twee gebooie gehoorsaam, sal ons Jesus se hart nooit bedroef nie.
– HELENE DE KOCK
13. Een mens kan baie uitrig
13
Een mens kan baie uitrig
Ek is net een, en tog is ek iemand. Ek kan nie alles doen nie, maar ek kan iets doen.
– HELEN KELLER
Komende van Helen Keller behoort hierdie kragtige woorde enige Christen te vertroos en te bemoedig wat probleme het met gestremdheid en hindernisse. Ons almal ondervind in ’n stadium groot hindernisse. Helen Keller was gestrem, en tog het sy hoopvol en vrugbaar gelewe. ’n Mens dink soms jy is so erg in die minderheid dat jy in elk geval niks aan die toedrag van sake kan doen nie. Helen Keller, blind en doofstom, het egter almal in die wêreld gewys dat sy iets kon doen in verband met die toestand van die wêreld. Deur haar geloof en haar moed het sy dinge vermag wat baie mense wat kan sien, hoor en praat net van kan droom. Daarom moet ’n mens dit wat jy doen tot God se eer laat strek, al voel jy jy is die enigste een op aarde wat met God wandel. Leef dus in die krag van God, wat hoop gee, en nie met hopeloosheid, wat jou van jou krag ontneem nie.
Om te leef soos die Here dit wil, is die krag van die opregte.
– SPREUKE 10:29
14. Deur u Gees
14
Deur u Gees
Here, ek besef ek is magteloos … Ek weet dit is nie deur my eie wysheid of mag dat kragtige dinge in my lewe gebeur nie, maar deur u Gees.
– STORMIE OMARTIAN
Dis eintlik wonderlik om tot die besef te kom dat ’n mens niks te doen het met die wonderlike dinge wat in jou lewe gebeur nie. Slegs God kan goeie, kragdadige dinge in jou lewe laat gebeur. En Hy doen dit, maar dan moet jy Hom in dankbaarheid toelaat om dit te doen. Wanneer ’n mens tot die besef gekom het dat jy eintlik heeltemal magteloos is, dat jy die afhanklikheid van ’n pasgebore babatjie het, dán gee jy die Heilige Gees die geleentheid om met oorgawe in jou te werk. Dis nie eie aan die mens se aard om te erken dat hy magteloos is nie, maar dis ’n feit dat mense niks goeds sonder God kan vermag nie. Daarom, gee jouself aan die Heilige Gees oor, vertrou op Hom soos ’n baba instinktief op sy moeder vertrou. Dan sal God met jou paaie loop wat jy andersins nooit sou kon aandurf nie. Jy sal die lewe met al sy terugslae met geesdrif die hoof kan bied.
Ek kry arms vol krag wanneer ek voor Hom staan met my probleme. Ek soek veiligheid by my God.
– PSALM 62:8 (DIE BOODSKAP)
15. Die voorreg van vriendskap
15
Die voorreg van vriendskap
Watter groot guns bewys God aan iemand wat Hy tussen goeie mense plaas.
– TERESA VAN ÁVILA
Dis ’n voorreg om tussen goeie mense geplaas te word. Om in ’n gesin te wees wat jou met liefde en begrip omring, al is hulle mense met foute, is ’n voorreg waarvoor jy God nooit genoeg kan dank nie. Om opregte vriende te hê is ’n skat wat jy moet koester. Ons het Dawid en Jonatan as voorbeeld: ’n Pragtige vriendskap het ontstaan, een waarin integriteit die botoon gevoer het. Die Here het Dawid werklik ’n wonderlike vriend gegee. Bid vir vriende met die lojaliteit van ’n Jonatan. Vra die Here dat Hy jou sal lei om ook vir ander ’n lojale vriend te wees. Ons moet mekaar liefhê en kan dit net doen as ons God in ons geselskap toelaat. Daar is soveel wat ons vir ander kan doen as ons Jesus in ons hart het. Gelowiges is goed vir ander. Bid dat jou familie en ook jy vir ander goed sal wees. Wees dan eerstens ’n goeie vriend, ’n goeie ouer en ’n goeie lidmaat.
Jonatan en Dawid het ’n verbond gesluit omdat Jonatan hom liefgekry het soos homself.
– 1 SAMUEL 18:3
16. Die Here gaan voor jou uit
16
Die Here gaan voor jou uit
Trek op, want … (d)ie Here gaan voor jou uit.
– RIGTERS 4:14, DEBORA
Daar is by dié bekende vroulike rigter, Debora, geen onsekerheid oor wat gedoen moet word nie. Haar sterk verhouding met God het haar as ’n sterk leier na vore laat tree, as iemand wat die toon kon aangee. Het jy ’n sterk verhouding met God? Beplan jy jou toekoms saam met Hom? Daar is gereeld tye dat ’n mens wonder hoekom God jou geplaas het waar jy is. Veral die werkplek laat jou wonder hoe jy enigsins kan uitstaan en doen wat God wil hê jy moet doen. Die enigste manier is om dit wat jy wil doen en die verskil wat jy wil maak, saam met Hom te bespreek en dit saam met Hom te beplan. So kan ek en jy slegs raad gee en onderhandel omdat ons beplanning strook met God s’n. Beplan dus, gaan uit en wees verseker dat jy ’n leier kan wees wat die wêreld kan wys dat jy tot baie in staat is wanneer God in beheer van jou lewe is. Leef só dat ander jou voorbeeld sal wil volg. Plaas God in beheer.
Debora wys vir ons wat ’n mens kan vermag as God in beheer is.
– DIE BYBEL IN PRAKTYK
17. Glo, al sien jy nie
17
Glo, al sien jy nie
Die Here het dit vir my gedoen.
– LUKAS 1:25, ELISABET, JOHANNES DIE DOPER SE MOEDER
Elisabet het, anders as haar man, Sagaria, onmiddellik geglo sy is swanger en God die krediet daarvoor gegee. Kinderlike geloof, erkentlikheid en dankbaarheid het hierdie vrou gekenmerk. Hoe dikwels vergeet ons dat God inderdaad die Een is wie se Woord ons onvoorwaardelik moet glo. Soos Elisabet moet ons eer aan God gee vir sy werke, werke wat ons nie elke dag sien nie. Ons moet ons nie blind staar daarteen om letterlik te kan sien wat God doen nie, want dis nie geloof nie. Laat geloof ons oë oopmaak. God se werke gebeur om ons, al sien ons dit nie. Fokus dus op jou geloof in God. Prys Hom. Ere aan God wat mense gesond maak; ere aan God wat gesinne weer by mekaar uitbring; ere aan God wat gebroke huise rus gee; ere aan God wat nuwe lewe gee. Ja, God se Woord en werke is oral. Al wat ons moet doen, is om te glo en God se werke in dankbaarheid te aanvaar. Glo dit.
Deur in Hom te glo, al sien julle Hom nou nie, het julle reeds deel aan die saligheid wat die einddoel van julle geloof is.
– 1 PETRUS 1:8–9
18. Kyk boontoe en vorentoe
18
Kyk boontoe en vorentoe
’n Omkyk-geloof is nie vir Jesus aanvaarbaar nie. As jy Hom wil volg, verwag Hy dat jy dit met hart en siel sal doen.
– NINA SMIT
’n Mens moenie gedurig twyfel nie. Dan warm en dan koud wees vir die Here nie. Leef voluit vir Hom. As jy besluit het om ’n Christen te wees, beteken dit jy gee jou lewe vir die Here. Elke dag is vir ons as Christene ’n toets. Daar is soveel keer wat die duiwel wil hê ons moet twyfel – en omkyk. Daar is mense wat ons ten kwade wil beïnvloed en ons kop agtertoe wil draai. Twyfelgedagtes en onsekerheid maak dat ons wil omkyk en wonder of ons die regte besluit geneem het om Hom te volg. Sulke gedagtes en ’n geloof wat gedurig wankel, is nie goed genoeg vir God nie. Ons moet volhard in ons geloof, en God vir volharding en ’n sterk geloof vra. Slegs dan kan ons vooruitgaan sonder om te twyfel. Wanneer God in beheer is, is daar geen rede om te twyfel nie. Kies goed, werk voort en kyk vorentoe na die koninkryk wat Hy vir ons gereed gemaak het vir ’n ewigheid saam met Hom.
Iemand wat die hand aan die ploeg slaan en aanhou omkyk na wat agter is, is nie geskik vir die koninkryk van God nie.
– LUKAS 9:62
19. Alleenlik maar die kruis
19