И яз, князь великий Всеволод поставил есми святому Ивану три старосты от житьих людей, и от черных тысяцкаго, а от купцев два старосты, управливати им всякия дела Иванская, и торговая, и гостинная, и суд торговый; а Мирославу посаднику в то не вступатца, и иным посадником в Иваньское ни въ что же, ни боярам новгороцкым.
А кто хочет в купечество вложиться в Иванское, даст купьцем пошлым вкладу пятьдесят гривен серебра, а тысяцкому сукно Ипьское, ино купцам положить в святыи Иван полътретьядцать гривен серебра; а не вложится кто в купечество, не даст пятьдесят гривен серебра, ино то не пошлый купець, а пошлым купцем ити им отчиною и вкладом.
А весити им в притворе святаго Ивана, где дано, ту его и дръжати; а весити старостам Иваньским, двема купцем пошьлым, добрым людем, а непошлым купцем старощениа не дръжати, ни весу им не весити Иваньского. А у гостя им имати: у Низовьского от дву берковска вощаных полъгривне серебра да гривенка перцю, у Полоцкого и у Смоленьского по две гривны кун от берковъска вощаного, у Новоторжанина полторы гривны от берковъска вощаного, у Новгородца шесть мордок от берковъска вощаного.
А куны им класти святаго великаго Ивана в дом, что вывесят, по правому слову; а Новгородцю не весити ни на которого гостя. А по моем животе великого князя Всеволода, стояти за дом святаго великого Ивана брату моему великому князю всея Русии, и владыце Новгороцкому, и старостам купецьким и купцам, и за вся церковникы святаго Ивана; а взять князю великому из весу вощаного полътретьядцать гривен серебра через год.
А праздник рожество святаго великого Ивана почесть створити и, лразновати старостам купецким и купцам; а имати старостам купецким и купцам из весу из вощаного на полътретьядцать гривен серебра, на всякый праздник святаго Ивана и в век; а старостам купецким святаго великого Ивана ставити на праздник святаго Ивана семъдесят свечь, и темьян и ладан.
А пети в праздник владыце, а старостам купецким и купцам дати владыце гривна серебра на сукно Ипьское; а назавтрее пети анхимандриту святаго Егориа, а взять ему полгривне серебра; а на третей день пети игумену святей богородици из Онътонова манастыря, взять ему полъгривне серебра. И яз князь великий Всеволод дал есми пошлины попом святаго великого Ивана Петрятино дворище с купець в Руси, на память князем великым дедом моим и прадедом, имати с купець тая старина и в векы; с Тверского гостя, и с Новгородцкого, и с Бежицкого, и с Деревьского, и с всего Помостья.
А буевище Петрятино дворище от прежних дверей святаго великого Ивана до погреба, от погреба до Концаньского мосту; а того буевища имати куны старостам Иваньским и старостам Побереским, а класти куны в дом святаго великого Ивана. А попов святаго великого Ивана, и дьякона, и дьяка, и сторожов