Andreas Vöst. Ludwig Thoma

Schuller fragte kurz:

      »Was sagst denn du dazua?«

      »Daß da Geitner a Tropf is.«

      »Und de Predigt?«

      »Dös hat mi gar it g'wundert, Schuller. I hab' das g'sagt, der Pfarra paßt dir an Weg ab. Hoaß is er scho lang auf di, und jetzt erst recht, weil er woaß, daß mir di zum Bürgermoasta hamm woll'n.«

      Der Schuller blieb stehen.

      »Wia'st mi vor acht Täg g'fragt hast, hon i dir mit Wahrheit g'sagt, daß i net gern Bürgermoasta wer. Aber jetzt, Haberlschneider, sieh'gst, jetzt möcht' i's wer'n. Und wenn's bloß desz'weg'n waar, daß mi der ander it ganz veracht'n derf.«