en êrens lê jy soos my afgekapte hande
in ’n voorlopige lakengraf
en lek verdriet en dooie gebede in jou kussing.
Ek wens ek kon sê ek verstaan nie
hoekom mense in noodweer rotgif & slaappille
& hulle sagte lywe vol merke sny nie,
maar in Woodstock skryf die wind
jou wanhoop met stukkende wolke
huil jou woede deur die vuil strate en kartonmense
vir iemand om te hoor.
Dapper muis
Klein Lea het leer loop, of liewer
begin steier deur die wye wêreld –
’n nuwe matroos oor die dek
op wankelrige bene
in ’n eerste groot storm.
Wanneer sy met haar arms uitgestrek vorentoe
wankel, gee sy die pas met “ap-ap-ap”
vir stap-stap aan.
In haar oë meng bang en ambisie,
maar sy gooi nie tou op nie,
want sy’s met drie woorde gewapen:
“Mamma-mamma”,
“Pappa-pappa”
en “Ka!” – haar naam vir Levinia die kat en alles
wat noemenswaardig is.
Vreemd wat woordeskat jou wysmaak ongelooflik
hoe die Rooisee padmaak
vir “Mamma” hoe my vrou soos Raponsie
in daardie toring van ’n woord verdwyn merkwaardig
hoe die wasmasjien, die broodmes, die mikrogolf,
’n appel, ’n trouring en ’n kat gehoorsaam
bondel in die lettergreep “Ka!”
hoe gedweë die hele groot geheimenis
om een gelowig gefluisterde “Pappa”
saamdrom.
II. Mountain View-weg 14, Capolavoro Estate, Kylemore, 7600
But where was there, in fact, to go?
Are some things better left unsaid?
Shall I tell you her name?
Can I say it again,
that I wanted to punch her right in the face?
Until we say the truth, there can be no tenderness.
As long as there is desire, we will not be safe
Tony Hoagland – “Adam and Eve”
Kerngesond
Op my veertigste verjaardag
is my hart ’n swart moordkuil,
tog lyk dit of ek lustig
met my vrou en dogtertjie
in ’n moderne spookhuisie
in ’n netjies omheinde veiligheidsoord
in die middelklasweelde van die wynland woon.
Ons is klaarblyklik doodgewoon selfs
geseënd.
Конец ознакомительного фрагмента.
Текст предоставлен ООО «ЛитРес».
Прочитайте эту книгу целиком, купив полную легальную версию на ЛитРес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.