hy hang so lig, hy klim so hoog; – my klein rooi vlag
wapper aan die uiterste twyg in verset teen die gram-
skap van die winterlug: laag, omsingelend & byna nag.
Oogwitte
vir Johann Lodewyk Marais
1. Strandwandeling
Die see sprei sy papirusrolle oop –
’n óérwys skriba – waar ek plegtig loop
neffens die witkruiswulp; teleskopeer
elke vervloë, ver gesogte saga
teen dié historiese siklorama.
2. Hologram
Die heelal is glo ’n soort hologram:
ongeag hoeveel keer jy dit verdeel,
ad infinitum, Verskiet ná Verskiet
bevat elke helfte die vól geheel.
Insek
Nietig, maar in elke opsig volmaak,
gooi jy, hoe gering ook,
jou skadu,
’n delikate fyn silhoeët,
onwesenlike klein kamee
tot die fynste detail afgewerk:
die spits skubbe op jou lyf,
jou geartikuleerde harnas
wat die lig vang
& soos olie op water iriseer.
Jy is ’n stralende stippel.
’n Kirliaanse korona.
Ek wou jou net o-so-lig-
weg aanraak, maar verbrysel jou
onder my vingertop.
Onsigbaar vir my growwer oog
is die besonderhede van jou
verbryseling: net ’n vuil strepie
sigbaar, klein soos ’n cédille,
op die onbeskrewe vel papier.
Hottentotsgot
Mantis religiosa
Kranige skadubokser af-
geteken agter ’n blaar, vlug-
voetige groen samoerai
met jou spigtige pantser,
lyf & harnas één,
’n groen hinder-
laag perfek gekamoefleer
met driehoekige kop wat krink
op ’n spits nek
& twee groot heuningkoek-oë.
Wagtend oorpeins jy
jou prooi: ’n mot, vlieg of suikerbekkie
waarvoor jy rats van monnik
na monster trans-
formeer met getande voorpote
wat blitssnel origami ont-
plooi, monstrans vir jou fees,
jou goddelike umami!
Ammoniet
Kamer na kamer word ontruim
om ál groter ruimtes te beset.
Wie sou ooit dink dat die siel
soveel kastele nodig het?
Конец ознакомительного фрагмента.
Текст предоставлен ООО «ЛитРес».
Прочитайте эту книгу целиком, купив полную легальную версию на ЛитРес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.