Мосцік над вечнасцю (зборнік). Сяргей Ваганаў

– гэта вецер вайны. Бо савецкі атам сапраўды мірным ніколі не быў. Ні ў Чарнобылі, які выбухнуў у выніку таемнага эксперыменту, ні на ракетных базах, чыя колькасць на душу беларускага насельніцтва была найвялікшай у Савецкім Саюзе. Хто-небудзь лічыў, колькі заўчасна вымерла гэтых душ, што жылі наўкол прыхаваных ў беларускіх лясах ракетных базаў?

      Не, падлікі рабіліся з іншай мэтай.

      Памятаю, як недзе дваццаць гадоў таму «вядучыя расійскія палітыкі і эканамісты» падлічвалі «плюсы і мінусы» ад уваходжання Беларусі ў расійскую рублёвую зону. Сярод плюсаў была «магчымасць захаваць у папярэднім выглядзе ваенныя аб’екты, узаемаадносіны ў ваеннай сферы», а заадно «выключыць магчымасць далучэння Беларусі да НАТА».