Dieter en Madame Zenobia (skooluitgawe). Nelia Engelbrecht

asof sy iets weet wat ander nie weet nie.

      Die volgende oggend is dit nog skemer toe ek en Krynauw by die skool aankom. Nadat ons ons fietse gebêre het, loop ons kantoorblok toe. In die voorportaal haal ek ’n stuk papier en ’n potlood uit my broeksak.

      “Wat van hierdie skilderye?” vra Krynauw.

      Jig, dit lyk of ’n graadeentjie die goed geteken het.

      Twee lelike skilderye – voorportaal, skryf ek op die papier. Daarna gaan ons na die hoof se kantoor toe. Sy deur is gelukkig nie gesluit nie. Ons loop vinnig oor die dik mat tot by die lessenaar. Ek begin skryf:

      Een papiergewig, twee goue penne …

      ’n Rukkie later kyk ek op my horlosie. “Ons beter waai. As die hoof ons hier vang, het ons moeilikheid.”

      Dan hoor ek dit. Voetstappe.

      En hulle kom reguit hierheen.