na dieselfde plek terug
Hoe vergelyk die wonder
die geboorte van my kind
dit was vinkel en koljander
by Rieta, Rosalind
Die skadu van die nagte
hang koud en moeg
daar klop dieselfde harte
in kerk of kroeg
Dis vinkel en koljander
in die Kongo of die Kaap
die geskille mag verander
maar oral bly die haat
En vinkel en koljander
dit help nie wat jul wens
die een is soos die ander
voor God as mens
Jy’t my gekierang
Jy’t my gekierang Dolie
jy’t my gefop
my hart o appelliefie
verdroë in sy dop
Die predikant sê agge nee
my ma sê agga gwaan
my ouma dink weg wêreld
waar kom ons hulp vandaan
Maar Dolie bokkie baby
jy’t my verstoot
al maak ek ook my daggies
nes kuikens vir jou groot
Al gee ek jou die dagbreek
se rooiwang-vy
jy’t laasnag – o my attatjie!
met ’n ander man gevry
My brakhond en my mak uil
tjank groot en wyd
maar Dolie bokkie baby
ons tjank een woord altyd
Ook mos mens
Nou’s jy treurig Wielie
maar ek sweer o bokkie
jy’s die kuiken nou nog
in my hart se doppie
Ek was ver van huis
en die lug se kap
staat so wyd en wit
oor die trekkerspad
Ag jy weet mos Wielie
en jy ken my vry
om ’n man te soen is
om hom lief te kry
En ek had hom lief
ja dit stry ek nie
anders sou ek hom
nie wou gevry het nie
Maar ek dag al reeds
in sy warm pondokkie
hy’s net ’n ander vorm
van jou my bokkie
Op die voetpad
Op die voetpad o bokkie
Jou hand die myne
En ons huisie staan klaar
In my hart se lyne
Deur die dag van die by
tot dit rooikrans o bokkie
Vannag sluit hom toe
In ons pondokkie
Klimaat van jou lyf
o meidjie dousag
Maar jou oë vlieg wyd
oor die nimmermeerdag
En die aand skilfer reeds
sy bont kleure af
Waar die voetpad alleen
oor die blou bulte draf
Begin somer
Vir Simone
Begin somer en die see
’n oopgebreekte kweper
die lug soos ’n kind
se ballon
ver bo die water
Onder die sambrele
soos gestreepte lekkergoed
miere van mense
en die gul lag van die baai
het goue tande
Kind met die geel emmertjie
en die vergete vlegsel
jou mond is sekerlik ’n klokkie
kleintongetjie klepeltjie
Jy bespeel die son daglank
soos ’n ukulele
Kabouterliefde
Vir Simone
Die kabouter met die rooi-rooi pet
die kabouter met die geel hemp aan
het sy hart gistraand vir my gegee
en sy hemp is vir die maan
Die hoepelronde blou-blou lug
het kadoemps op die grond geval
hy’t dit blink-blou in sy hand gerol
toe speel ons daarmee bal
Die sterre met hul wit ligte
het geknipoog toe ons lag
hul’t rondom ons in ’n kring getrek
soos ’n laer in die nag
Die aandblom het sy trom-trompet
geblaas in die warrelwindkring
die kalkoentjies met hul rooi mondjies
het die sprinkaan-wals gesing
Die maan met sy geel lyfie
het gaan plat lê op sy rug
hy’t gaan slaap by die gousblomme
met sy boepens in die lug
Die kabouter met die rooi-rooi hart
het dit self vir my gesê
hy’t die aardbol oor sy kop gegooi
o dis hier waar die liefde lê
Korreltjie sand
Korreltjie korreltjie sand
klippie gerol in my hand
klippie gesteek in my sak
word korreltjie klein en plat
Sonnetjie groot in die blou
ek maak net ’n ogie van jou
blink in my korreltjie klippie
dit is genoeg vir die rukkie
Kindjie wat skreeu uit die skoot
niks in die wêreld is groot
stilletjies lag nou en praat
stilte in Doodloopstraat
Wêreldjie rond en aardblou
korreltjie maak ek van jou
huisie