So, sê die Here Jesus, is die koninkryk van God ook besig om te groei. Dit groei nie net in die kerk nie, maar oor die hele wêreld. Elkeen van ons het ’n rol om te speel – by die huis en by die skool en op kampus en in die kantoor of winkel of op die plaas. Ons doen maar net ons deeltjie getrou, en God gee wonderwerke: nuwe mense!
GEBED:
Hemelse Vader, dit is net U wat sulke wonderwerke in mense se lewens kan laat gebeur. Gebruik ons ook in u groot plan.
Lees vanaand in Markus 4:33–41 hoe die dissipels ’n storm nodig gehad het om Jesus beter te leer ken.
Donderdag 13 Maart 2014 Lees eers Markus 5:1-13
Hopeloos?
Hy was dag en nag aan die skreeu tussen die grafte en in die berge, en dan kap hy homself met klippe. – Mark 5:5
GESELSVRAAG:
Hoe doen mense hulself deesdae skade aan?
“Bid vir my man, dat die Here hom van die drank sal bevry,” skryf ’n vrou op die internet. Sy het al alles probeer, maar niks het gehelp nie. Sy huwelik was op die rotse. Sy kinders het hom gevrees. Hy het sy werk verloor. Hy het al motorongelukke veroorsaak deur dronk te bestuur. Net die Here kan hom nog help.
Legio was eens op ’n tyd ook deel van ’n gesin, want Jesus het hom uiteindelik terug na hulle toe gestuur. Ons kan ons indink hoe bekommerd en ontsteld die gesinslede was toe hulle sien hoe hul geliefde man, broer en pa van kwaad na erger gaan. As jy die duiwel vatplek gee in jou lewe, gaan dit altyd sleg met jou. Vra maar enigiemand wie se geliefde in die kloue van alkohol of ander dwelms beland het. Almal sien hy het hulp nodig, behalwe hy self. Selfs kettings en boeie kon hom nie meer beheer nie. En sodra hy losgebreek het, het hy homself beseer deur homself met klippe te kap. Die duiwel het sy lewe volledig beheer. Totdat Jesus gekom het.
Miskien sien jy iets van Legio in jouself of in die lewe van ’n geliefde. Met Jesus in die omgewing is alles nog nie verlore nie. Diep in sy hart het Legio nog gehoop vir bevryding – ons lees dat hy nader gehardloop en voor Jesus neergeval het. Dít is die regte plek vir iemand wat waarlik vry wil wees (Joh 8:36).
GEBED:
Here, ons bid vir ons geliefdes in die mag van die bose.
Lees vanaand in Markus 5:14-20 hoe mense soms dom keuses maak en hoe een mens ’n verskil in ’n hele streek kan maak.
Vrydag 14 Maart 2014 Lees eers Markus 5:21-34
Die aanraking wat lewe gee
[…] Hy het Hom in die gedrang omgedraai en gevra: “Wie het aan my klere geraak?” – Mark 5:30
GESELSVRAAG:
Wat is jou grootste geheim?
“Het iemand jou gemolesteer?” vra die berader vir die vrou wat hom kom sien het. En toe bars die damwal. Haar boetie het haar herhaaldelik as tienjarige meisietjie verkrag en sy het nog nooit met iemand daaroor gepraat nie. Dit het haar lewe totaal geknou. Eers toe sy oopmaak, kon die Here haar volkome herstel.
Die vrou in vandag se gedeelte het al twaalf jaar lank gely aan haar kwaal en is deur dokters behandel. Dit was ’n kwaal waaroor niemand gepraat het nie – sy kon tog nie openlik na die profeet gaan en vertel wat sy makeer nie. Die wet het haar dan belet om aan enigiemand te raak, want dit sou hulle ook onrein maak. So het sy in stilte gely en arm geword. Toe het sy van Jesus gehoor. Sy kon Hom nie aanraak nie, maar sy wou net aan sy klere raak. En toe werk dit! Sy wou toe dadelik weer in die skare wegsluip. Maar Jesus het haar net daar voorgekeer. Wat ’n skande om so betrap te word! Maar Hy wou haar net die sekerheid gee dat sy vir goed genees is. Dit was haar geloof in Hom, nie die klere nie, wat haar genees het.
Het jy ook iets waaroor jy so skaam is dat jy nog nooit vir iemand daarvan vertel het nie? Gaan jy nog steeds gebuk onder die las – daardie wond of letsel wat jou lewe vandag nog beïnvloed? Jesus is die regte persoon – Hy genees volkome – ook innerlik.
GEBED:
Here, wys my wat ek vandag aan U moet oorgee.
Lees vanaand in Markus 5:35-43 hoe Jesus Jaïrus se dogtertjie uit die dood opgewek en volkome laat herstel het.
Saterdag 15 Maart 2014 Lees eers Markus 6:1-6
Beperk jy die Here?
Hy kon daar geen enkele wonderwerk doen nie, behalwe dat Hy sy hande op ’n paar siekes gelê en hulle gesond gemaak het. – Mark 6:5
GESELSVRAAG:
Watter wonderlike dinge sien ons dikwels nie raak nie?
“’n Mens kan so gewoond raak aan die evangelie dat jy dit nie meer hoor nie.” Baie mense het in die kerk grootgeword en ken die Bybelstories van kleins af. Dis ou nuus. Dit maak ons nie meer opgewonde nie. Maar mense wat anders grootgeword het, vind die evangelie wonderlik.
So was dit ook in Kapernaum, waar Jesus grootgeword het. Sy eie bure en kennisse was verstom oor wat Hy hulle in die sinagoge geleer het. Hulle het ook gehoor van die wonderwerke wat Hy gedoen het. Hoe kan dit wees – Hy is dan die bekende timmerman wat handewerk vir hulle gedoen het? Sy familie is goed bekend. Hy het tog nie universiteitsgrade of baie geld gehad nie. Hulle wou niks van Hom weet nie (Mark 6:3). Ons lees net van twee keer dat die Here Jesus verbaas of verwonderd was. Die een keer was oor die geloof van ’n Romeinse offisier (Luk 7:9). Die ander keer was hier, oor die ongeloof van mense wat Hom goed geken het.
Watter soort lidmaat is jy? Is jy iemand wat die Here ken en dien, wat vol geloof is om dinge vir die Here te doen? Verwag jy groot dinge van die Here, of is jy dalk ook een van die bekendes wat niks van die Here verwag nie, omdat Hy vir jou ou nuus is?
GEBED:
Here Jesus, ek moet bely dat U nie altyd vir my wonderlik is nie. Raak my aan, sodat my geloof vars kan wees.
Lees vanaand in Markus 6:7-13 hoe Jesus sy dissipels praktiese opleiding gegee het. ’n Mens leer deur te doen.
Sondag 16 Maart 2014 Lees eers Psalm 135:1-7
Die wonder van aanbidding
Prys die Here, want die Here is goed, sing tot eer van sy lieflike Naam. – Ps 135:3
GESELSVRAAG:
Wat is vir jou lekker aan kerk toe gaan?
“Die jongmense het vyfuur elke oggend bymekaargekom om die Here ’n uur lank te loof en te prys. Selfs ná ’n uur op ons voete was ons nog nie moeg nie, want die leiers was goed voorberei en het bypassende Skrifgedeeltes voorgelees,” vertel ’n bejaarde sendeling wat ’n weeklange sendingkonferensie in ’n township bygewoon het. In ons gemeente kom baie mense eers op die laaste nippertjie kerk toe sodat hulle die voorafsang kan misloop. Wat is die verskil?
In vanoggend se psalm kry ons die herhaalde opdrag om die Here te prys. Dit is nie vir hulle ’n pynlike beproewing nie, maar iets heerliks, want die Here is wonderlik. Hy het wonderlike dinge vir hulle gedoen. Hulle ken die Here. Hulle is bewus van sy wonders; daarom is dit vir hulle lekker om Hom te loof. Hulle kan bedoel wat hulle sing. Die woorde van hierdie psalm is aangrypend. Dit kom uit die hart. Die gemeente sien God se hand in alles wat gebeur op die aarde, in die see en in die lug. Hy is ’n wonderlike God, ver bokant al die ander nasies se afgode.
Dit is Hy wat ons vandag ook saam wil loof. Sien jy uit daarna? Hoekom, of hoekom nie? Kom ons berei ons voor vir daardie besondere ontmoeting met die lewende God.
GEBED:
Ons prys U vir wie U is en vir alles wat U elke dag doen, Hemelse Vader. U gee vir ons elke dag vreugde.