– Corrie ten Boom.
4 Wie vertrou ek met my droefheid?
Vir mense wat hulle vertroue volkome in God stel, is alles moontlik. Hoe meer ’n mens op God vertrou, hoe betroubaarder vind jy Hom. God is vol deernis en medelye met jou en Hy faal jou nooit – selfs nie in jou diepste droefheid en rouste smart nie. Hy verwag alleen dat jy onvoorwaardelik en volkome op Hom moet vertrou. Hoe groter die las wat ’n mens dra, hoe groter is jou behoefte aan iemand op wie jy onwrikbaar kan vertrou. Alleen die Almagtige kan aan hierdie hoë eis beantwoord. Sy wil vir jou is enkel goed en Hy alleen is in staat om kwaad in goed te omskep, droefheid in blydskap, en trane in lag.
Die feit dat ’n mens nie weet hoe Hy dit gaan doen nie, beteken nie dat jy Hom nie kan vertrou nie. God maak nooit ’n fout nie en elke gebeurtenis op jou lewenspad voltooi ’n stukkie van sy groot legkaart vir jou lewe.
’n Mens vertrou gewoonlik jou geneesheer onvoorwaardelik, al verstaan jy nie alles van die snykunde wat hy op jou gaan toepas nie. Waarom sal jy nie die alwetende en liefdevolle God met jou lewe vertrou nie? Een aspek wat droefheid en verlies opnuut beklemtoon, is ’n mens se onvermoë om te verstaan wat met jou gebeur het en wat die toekoms vir jou inhou. Dit is juis in hierdie tyd dat ’n onwrikbare vertroue op God gemoedsrus en vrede bring. God sal sy plan uitvoer en jy sal uiteindelik in verwondering moet uitroep: “Hy het alles goed gedoen!”
Hoe groter en vaster jou vertroue op God is, hoe oorvloediger sal jy ontvang wat jy van Hom vra. Thomas Merton het ’n belangrike geestelike waarheid beklemtoon: “Geloofsvertroue is die énigste sleutel tot begrip vir God se dade. Die werklike betekenis van ons menslike bestaan, die antwoorde op al die vrae wat ons gemoedsrus en geluk bepaal, kan op géén ander manier ontdek word nie.” As ons volkome op God vertrou, omskep Hy ons droefheid in vrolike gesange van bevryding.
Here en Meester,
ek lê myself en my droefheid
en verwarring aan u voete neer,
met die stille geloofsvertroue
dat u wil met my geskied.
Laat jou lewe aan die Here oor
en vertrou op Hom;
Hy sal sorg.
(Ps 37:5)
DAAR IS GEEN WARE VRYHEID NIE BEHALWE DIE VRYHEID VAN HÚLLE WAT AAN GOD VASKLEM
– Augustinus van Hippo.
5 Hemelse vertroosting
Indien ons slegs ’n vae beeld kon hê van die hemelse heerlikheid, sou ons nie treur oor ons ontslape dierbares nie, maar liefs oor ons wat agterbly. So onbeskryflik is God se volmaakte voorsiening vir hulle wat in Hom glo dat daar in sy teenwoordigheid net blydskap en vervulling is.
Openbaring bied telkens flitse van hierdie hemelse heerlikheid: Dié wat daar woon, is verhef bo aardse pyn en beproewing en word liefdevol vertroos deur Hom wat op die troon sit. Hulle honger word gestil in groen weivelde en hulle dors word geles by die fonteine van lewende water. God self vee die laaste trane van hulle oë af weg (vgl Op 7:16-17). As ons hulle vreugde net maar gedeeltelik kon begryp, sou dit ons verskeurde harte uitermate vertroos. Dis goed om te weet die aarde het geen droefheid wat God in die hemel nie kan genees nie.
Jesus het met sy vertrek na die Vaderhuis belowe om ’n ander Trooster te stuur wat vir ewig by ons sal bly: die Heilige Gees. Sy God-opgelegde taak is om ons hier op aarde in die waarheid te lei en ons te vertroos, soos wat Jesus dit vir ons in die hemel sal doen.
Die wete dat ons ontslape dierbares die besitters is van al die glorieryke gawes wat ons met die woord “hemel” omsluit, dring ons om ons te verheug in God se ryke genade. Dit gee ons moed om ons ontwrigte lewens in die geloof te hervat. Wie hierdie troos nie het nie, is aan wanhoop blootgestel. Met God se vertroosting in ons harte kan ons te midde van die grootste droefheid staande bly. “Om aan God in die hemel te glo is nie om van die lewe af weg te vlug nie, maar om die lewe tegemoet te gaan” (J Blinco).
Hemelse Vader,
vertroos in genade
deur u Heilige Gees almal wat treur
en sterk hulle om die uitdagings
van ’n nuwe lewensfase te aanvaar.
Doen dit deur die krag wat daar is
in ons opgestane Heiland,
Jesus Christus.
Wat die oog nie gesien
en die oor nie gehoor het nie,
en wat in die hart van ’n mens
nie opgekom het nie,
dit het God gereed gemaak
vir dié wat Hom liefhet.
(1 Kor 2:9)
DAAR IS GEEN KROONDRAERS IN DIE HEMEL WAT NIE KRUISDRAERS OP AARDE WAS NIE
– Charles H Spurgeon.
6 Hoe sal ek ooit my droefheid hanteer?
Job het jare lank die liefde van sy kinders geniet en aan hulle sy liefde in oorvloed gegee. Ten spyte van sy verwarring en smart in die donker uur toe God hulle van hom weggeneem het, was daar by hom geen opstand nie.
Om te rebelleer teen ons “ongelukkige noodlot” (soos ons dit soms verkeerdelik noem) is in werklikheid om teen God in opstand te kom. Die dood is deel van God se lewensplan vir ons en daarom is gelowige aanvaarding daarvan ’n teken van geestelike volwassenheid. Oor aanvaarding het C S Lewis gesê: “’n Mens kan aanvaar wat God gedoen het sonder om te weet hoe dit werk; inderdaad, jy sal sekerlik nie weet hoe dit werk voordat jy dit aanvaar het nie.”
Om van God af weg te draai is om ons droefheid alleen en sonder hulp te moet dra. Dit lei tot wanhoop. Dit skep ’n verwydering tussen ons en God, want God kan ’n opstandige hart nie help of vertroos nie. Om ons droefheid te probeer ontvlug deur ons in ons werk te begrawe, los ook nie die probleem op nie. Dis soos wanneer ’n mens ’n verdowingsmiddel neem om jou pyn te stil. Op sy beste bring dit slegs tydelike verligting, maar dit genees nie die oorsaak van die probleem nie. Hoe meer ons onsself mislei, hoe ondraagliker word die waarheid.
God plaas nooit sy kinders in ’n vuuroond sonder dat Hy self daar by hulle is nie. As ons nie iets leer en geestelik groei in tye van beproewing nie, is ook ons lyding enkel verlies. Die ervaring van duisende van God se gelowige kinders bewys dat tye van lyding juis die optimale groeityd in ’n mens se lewe kan wees – mits jy dit in die regte gesindheid deurworstel. Die enigste manier waarop Christene hulle droefheid kan erken en verwerk, is om die voorbeeld van ons Meester na te volg: om kalm en moedig die lewe te aanvaar en met ’n vreeslose hart en ongeknakte rug onder die kruis in te buig. Die bevryding lê in die seker wete dat die sin van die lewe nie duskant nie, maar anderkant Golgota en die graf gevind word.
Verlosser en Heiland,
al het ek nie al die antwoorde nie,
het ek U in my lewe.
Ek hou aan U vas met die gelowige wete
dat u liefde my nooit
aan wanhoop sal uitlewer nie.
As ons die goeie van God aanvaar,
moet ons nie ook die slegte aanvaar nie?
(Job 2:10)
DIE VREEMDSTE WAARHEID VAN DIE EVANGELIE IS DAT VERLOSSING UIT LYDING GEBORE WORD
– Milo L Chapman.
7 Laat hulle gaan
Lasarus moes op bevel van Christus losgemaak word van die grafdoeke sodat hy vry kon wees om terug te gaan na die lewe en na hulle wat hom liefhet. Diegene wat ’n geliefde aan die dood afgestaan het, moet hom of haar laat gaan na ’n nuwe en verheerlikte lewe