Reënboog deur my trane
Troos vir treurendes
Solly Ozrovech
Lux Verbi
Opgedra aan almal saam met wie
ons sterwensbegeleiding en die
verwerking van hul droefheid
meegemaak het.
Ook aan oupa en ouma Du Toit
wat ons geleer het om ons
droefheid met waardigheid te dra.
1 God se vertroosting
Die dood van ’n dierbare kom altyd as ’n skok – of dit skielik en onverwags is en of dit lank reeds verwag is. Met die verlies van ’n dierbare is dit asof ’n mens uit voeling raak met die werklikheid. Die droefheid oor en die finaliteit van jou verlies oorweldig jou met ’n byna onhanteerbare eensaamheid. Daarby besef jy dat die toekoms skielik moeilike beslissings én veranderinge inhou.
Al is jou verlies op hierdie oomblik pynlik en byna ondraaglik, moet jy altyd aan God se belofte van bystand en troos vashou:
“Soos ’n moeder haar kind laat veilig voel, so laat Ek julle veilig voel” (Jes 66:13). God antwoord op sy kinders se verwarde “Waarom?” met hierdie gerusstellende versekering: “Ek is by jou; Ek versterk jou.”
Victor Hugo het gesê: “Droefheid is ’n vrug. God laat dit slegs groei aan lote wat Hy sterk genoeg ag om dit te dra.” Wanneer jy dus worstel met die pyn ná die dood van ’n geliefde, kan jy ryke vertroosting put uit die Skrif en die ervarings van ander wat dieselfde smartlike pad geloop het.
’n Wyse man het aan ’n bedroefde vriend gesê: “Ek het nie gekom om jou te vertroos nie – alleen God kan dit doen. Ek het net vir jou kom sê hoe diep en innig ek met jou meevoel in jou verlies.” Mense wat opreg omgee, kan nie uit hulleself dié vertroosting bring wat verskeurde harte sal genees nie, maar God kan hulle gebruik om kanale vir sý vertroosting te wees.
Vertrou net stilweg van dag tot dag op God. Hy sal sy vertroosting skenk soos ’n lentereën in die barre woestyn. As jy op Hom vertrou het toe jou lewensboom oortrek was met lentebloeisels, kan jy Hom ook nou in die koue van jou wintersmart vertrou. Buite God om is daar geen hoop op blywende troos nie.
Ek pleit om u vertroosting, Here,
soos wat U alleen dit kan gee.
Skenk genesing vir my verskeurde gemoed
en laat my deur my trane die reënboog van
hoop sien. Om Christus ontwil.
Moenie bang wees nie,
Ek is by jou,
moenie bekommerd wees nie,
Ek is jou God.
Ek versterk jou,
Ek help jou,
Ek hou jou vas,
met my eie hand red Ek jou.
(Jes 41:10)
ONS VERSTAAN DIE DOOD EERS WANNEER HY SY HAND LÊ OP IEMAND WAT ONS LIEFHET
– Anne L de Stael.
2 Lig in die duisternis
Die wêreld kan skielik stikdonker lyk wanneer ’n dierbare sterf. Dan verloor ’n mens maklik uitsig op die lewe. Jy reageer soos ’n blinde wat onseker voortstrompel. Dit word vir jou so moeilik om die duisternis te hanteer dat jy selfs nie die hulpmiddels wat God tot jou beskikking stel, doeltreffend kan gebruik nie. Dit voel asof alles in jou lewe bydra om die nag nog swarter te maak.
Daar is mense wat dié blindheid triomfantlik oorwin – nie op grond van hulle verskerpte sintuie, brailleskrif of ’n wit kierie nie, maar deur Christus wat hulle in staat stel om uit die duisternis die lig te betree. Jesus is die ware lig wat elke mens verlig (vgl Joh 1:9). Wanneer jou pad vorentoe onseker is en jy moeilike beslissings moet maak, lei Christus jou tree vir tree uit die duisternis van droefheid en verwarring tot in sy wonderbare lig.
“In die donker is daar geen keuses nie – dit is die lig wat ons in staat stel om verskille waar te neem. Christus is die gewer van dié lig” (C T Whitmell). God gee jou in Christus die ewige lig wat sy onveranderlike liefde en genade weerkaats. Die ligstrale van God se liefde omvou jou; Hy beskerm jou teen gevare waarvan jy onbewus is. In tye van droefheid en smart hou Hy liefdevol oor jou die wag.
Laat ons daarom in tye van nood nie dieper die donkerte in vlug nie, maar eerder soos die blom wat in die skaduwee groei, ons gesig na dié Lig toe draai. In Christus lê oorwinning en stralende blydskap en deur Hom groei ons seënryk in die volle sonskyn van God se onmeetlike liefde.
Liefdevolle Christus,
help my om moedig en verstandig
die lig te betree waarmee
U my lewensweg bestraal.
Ek plaas my hand vertrouend
in u hand –
lei my in u lig.
In Hom was daar lewe,
en dié lewe was die lig vir die mense.
Die lig skyn in die duisternis,
die duisternis kon dit nie uitdoof nie.
(Joh 1:4-5)
TROOS IN BEPROEWING KAN ALLEEN VERSEKER WORD DEUR ’N VASTE GELOOF WAT GEGROND IS OP DIE SKRIF EN DIE LEERSTELLINGS VAN CHRISTUS
– Thomas Moore.
3 Beloftes wat troosryk vervul word
Ons het die vaste belofte dat God ons nooit sal begewe of verlaat nie. Maar God belowe nie net nie – in sy almag en genade doen Hy sy woord gestand. Hy is dié God wat die beloftes waar maak, selfs wanneer dit onmoontlik lyk – selfs wanneer omstandighede die teendeel wil bewys. Terwyl Jakob vlug, ontvang hy in die nag by Bet-E1 dié belofte: “Ek is by jou en Ek sal jou beskerm waar jy ook al gaan” (Gen 28:15). Hoe wonderlik het God nie hierdie belofte waar gemaak nie!
Josua, die jong leier wat die Israeliete die land Kanaän moet binnelei, ontvang dié bemoedigende belofte van God: “Soos Ek by Moses was, so sal Ek by jou wees. Ek sal jou nie in die steek laat nie, jou nie verlaat nie” (Jos 1:5). En Josua hét dag na dag God se wonderlike teenwoordigheid ervaar.
Voordat Dawid sterf, versterk hy sy seun Salomo met hierdie woorde: “God die Here, my God, is by jou. Hy sal jou nie aan jouself oorlaat of jou verlaat nie” (1 Kron 28:20). God het dit onwrikbaar gedoen.
In die Hebreërbrief kry ons die versekering dat hierdie belofte uitgebrei word om almal in te sluit wat in Jesus Christus glo en op Hom vertrou. Wanneer ’n mens iemand aan die dood afgee, ontstaan daar ’n leemte wat nie gevul kan word nie. Dan het jy God se beloftes so nodig en kry hulle vir jou nuwe betekenis. Te midde van jou eensaamheid verseker Hy jou dat jy nooit werklik alleen is nie, want Hy is dáár, mét jou!
God is regverdig en heilig, daarom sal Hy jou nie bedrieg nie. God is genadig en goed, daarom sal Hy jou nie vergeet nie. God is ewig en waar, daarom sal Hy nie verander nie. God is almagtig, daarom is niks vir Hom onmoontlik nie. Wat God belowe, kán en sal Hy doen! Loof die Here, o my siel!
Heilige God,
U wat in Jesus Christus ook my Vader is,
dankie dat ek op u beloftes kan bou
deur ’n vaste geloof
en deur die verdienste van my Heiland,
Jesus Christus.
Daarom kan ons met vertroue sê:
“Die Here is my helper,
ek ken geen vrees nie:
wat kan ’n mens aan my doen?”
(Heb