"Sam'l was rale weel liked, for he was saft-spoken to everybody, an' fond o' ha'en a gossip wi' ony ane 'at was aboot the farm. We didna care sae muckle for the wife, Eppie Lownie, for she managed the farm, an' she was fell hard an' terrible reserved we thocht, no even likin' ony body to get friendly wi' the mester, as we called Sam'l. Ay, we made a richt mistak."
As I had heard frequently of this queer, mournful mistake made by those who considered Sam'l unfortunate in his wife, I turned Jess on to the main line of her story.
"It was the ghost cradle, as they named it, 'at I meant to tell ye aboot. The Bog was a bigger farm in thae days than noo, but I daursay it has the new steadin' yet. Ay, it winna be new noo, but at the time there were sic a commotion aboot the ghost cradle, they were juist puttin' the new steadin' up. There was sax or mair masons at it, wi' the lads on the farm helpin', an' as they were all sleepin' at the farm, there was great stir aboot the place. I couldna tell ye hoo the story aboot the farm's bein' haunted rose, to begin wi', but I mind fine hoo fleid I was; ay, an' no only me, but every man-body an' woman-body on the farm. It was aye late 'at the soond began, an' we never saw naething, we juist heard it. The masons said they wouldna hae been sae fleid if they could hae seen't, but it never was seen. It had the soond o' a cradle rockin', an' when we lay in our beds hearkenin', it grew louder an' louder till it wasna to be borne, an' the women-folk fair skirled wi' fear. The mester was intimate wi' a' the stories aboot ghosts an' water-kelpies an' sic like, an' we couldna help listenin' to them. But he aye said 'at ghosts 'at was juist heard an' no seen was the maist fearsome an' wicked. For all there was sic fear ower the hale farm-toon 'at naebody would gang ower the door alane after the gloamin' cam, the mester said he wasna fleid to sleep i' the kitchen by 'imsel. We thocht it richt brave o' 'im, for ye see he was as helpless as a bairn.
"Richt queer stories rose aboot the cradle, an' travelled to the ither farms. The wife didna like them ava, for it was said 'at there maun hae been some awful murder o' an infant on the farm, or we wouldna be haunted by a cradle. Syne folk began to mind 'at there had been na bairns born on the farm as far back as onybody kent, an' it was said 'at some lang syne crime had made the Bog cursed.
"Dinna think 'at we juist lay in our beds or sat round the fire shakkin' wi' fear. Everything 'at could be dune was dune. In the daytime, when naething was heard, the masons explored ae place i' the farm, in the hope o' findin' oot 'at the sound was caused by sic a thing as the wind playin' on the wood in the garret. Even at nichts, when they couldna sleep wi' the soond, I've kent them rise in a body an' gang all ower the house wi' lichts. I've seen them climbin' on the new steadin', crawlin' alang the rafters, haudin' their cruizey lamps afore them, an' us women-bodies shiverin' wi' fear at the door. It was on ane o' thae nights 'at a mason fell off the rafters an' broke his leg. Weel, sic a state was the men in to find oot what it was 'at was terrifyin' them sae muckle, 'at the rest o' them climbed up at aince to the place he'd fallen frae, thinkin' there was something there 'at had fleid im. But though they crawled back an' forrit there was naething ava.
"The rockin' was louder, we thocht, after that nicht, an' syne the men said it would go on till somebody was killed. That idea took a richt haud o' them, an' twa ran awa back to Tilliedrum, whaur they had come frae. They gaed thegither i' the middle o' the nicht, an' it was thocht next mornin' 'at the ghost had spirited them awa.
"Ye couldna conceive hoo low-spirited we all were after the masons had gien up hope o' findin' a nat'ral cause for the soond. At ord'nar times there's no ony mair lichtsome place than a farm after the men hae come in to their supper, but at the Bog we sat dour an' sullen; an' there wasna a mason or a farm-servant 'at would gang by 'imsel as far as the end o' the hoose whaur the peats was keepit. The mistress maun hae saved some siller that spring through the Egyptians (gypsies) keepin' awa, for the farm had got sic an ill name, 'at nae tinkler would come near 't at nicht. The tailorman an' his laddie 'at should hae bidden wi' us to sew things for the men, walkit off fair skeered one mornin', an' settled doon at the farm o' Craigiebuckle fower mile awa, whaur our lads had to gae to them. Ay, I mind the tailor's sendin' the laddie for the money owin' him; he hadna the speerit to venture again within soond o' the cradle 'imsel. The men on the farm though, couldna blame 'im for that. They were juist as flichtered themsels, an' mony a time I saw them hittin' the dogs for whinin' at the soond. The wy the dogs took on was fearsome in itsel, for they seemed to ken, aye when nicht cam on, 'at the rockin' would sune begin, an' if they werena chained they cam runnin' to the hoose. I hae heard the hale glen fu, as ye micht say, wi' the whinin' o' dogs, for the dogs on the other farms took up the cry, an' in a glen ye can hear soonds terrible far awa at nicht.
"As lang as we sat i' the kitchen, listenin' to what the mester had to say aboot the ghosts in his young days, the cradle would be still, but we were nae suner awa speeritless to our beds than it began, an' sometimes it lasted till mornin'. We lookit upon the mester almost wi' awe, sittin' there sae helpless in his chair, an' no fleid to be left alane. He had lang white hair, an' a saft bonny face 'at would hae made 'im respeckit by onybody, an' aye when we speired if he wasna fleid to be left alane, he said, 'Them 'at has a clear conscience has naething to fear frae ghosts.'
"There was some 'at said the curse would never leave the farm till the house was razed to the ground, an' it's the truth I'm tellin' ye when I say there was talk among the men aboot settin 't on fire. The mester was richt stern when he heard o' that, quotin' frae Scripture in a solemn wy 'at abashed the masons, but he said 'at in his opeenion there was a bairn buried on the farm, an' till it was found the cradle would go on rockin'. After that the masons dug in a lot o' places lookin' for the body, an' they found some queer things, too, but never nae sign o' a murdered litlin'. Ay, I dinna ken what would hae happened if the commotion had gaen on muckle langer. One thing I'm sure o' is 'at the mistress would hae gaen daft, she took it a' sae terrible to heart.
"I lauch at it noo, but I tell ye I used to tak my heart to my bed in my mooth. If ye hinna heard the story I dinna think ye 'll be able to guess what the ghost cradle was."
I said I had been trying to think what the tray had to do with it.
"It had everything to do wi't," said Jess; "an' if the masons had kent hoo that cradle was rockit, I think they would hae killed the mester. It was Eppie 'at found oot, an' she telt naebody but me, though mony a ane kens noo. I see ye canna mak it oot yet, so I'll tell ye what the cradle was. The tray was keepit against the kitchen wall near the mester, an' he played on't wi' his foot. He made it gang, bump bump, an' the soond was just like a cradle rockin'. Ye could hardly believe sic a thing would hae made that din, but it did, an' ye see we lay in our beds hearkenin' for't. Ay, when Eppie telt me, I could scarce believe 'at that guid devout-lookin' man could hae been sae wicked. Ye see, when he found hoo terrified we a' were, he keepit it up. The wy Eppie found out i' the tail o' the day was by wonderin' at 'im sleepin' sae muckle in the daytime. He did that so as to be fresh for his sport at nicht. What a fine releegious man we thocht 'im, too!
"Eppie couldna bear the very sicht o' the tray after that, an' she telt me to break it up; but I keepit it, ye see. The lump i' the middle's the mark, as ye may say, o' the auld man's foot."
Chapter XII.
The Tragedy of a Wife
Were Jess still alive to tell the life-story of Sam'l Fletcher and his wife, you could not hear it and sit still. The ghost cradle is but a page from the black history of a woman who married, to be blotted out from that hour. One case of the kind I myself have known, of a woman so good mated to a man so selfish that I cannot think of her even now with a steady mouth. Hers was the tragedy of living on, more mournful than the tragedy that kills. In Thrums the weavers spoke of "lousing" from their looms, removing the chains, and there