“As doodgewone, goeie mense wat tot geloof gekom het, is dit eerder tussen ‘goed vir mý’ of ‘beter vir ánder’ wat ek moet kies.”
Jy sien, as die Jesus-pad net ’n tipe versekeringspolis is terwyl ek ongestoord op my doodgoeie, gewone pad voortgaan, sal ek nooit die radikaliteit van hierdie alternatief begryp nie. As Jesus bloot ’n add-on is (selfs al is dit wat my betref ’n ernstige en toegewyde add-on) sal ek my geloof bloot ervaar as ’n lewe wat gerieflik kan voortgaan. Darem nou mét Jesus – sodat dit voortaan selfs nóg beter sal gaan.
Voordat ek nie hierdie gewone en doodgoeie pad waarop ek so tuis is, ontmasker as ’n doodloopstraat op weg Ashoop toe nie, sal ek nooit die rewolusionêre of aktivistiese pad van Hoop verstaan nie. Dan is dit soos om te sê dat ek wel die potensiaal het om ’n skoenlapper te word, maar dat ek verkies om nie die metamorfose te deurloop nie. Nee, ek kies eerder die wurm-status.
Dietrich Bonhoeffer – die jong dominee-aktivis wat weens sy teenkanting teen die Nazi’s gehang is – het hierdie pad van Hoop goed verstaan. Hy het gesê: “When Christ calls a man, He bids him come and die.”
Op hierdie pad sterf jy soos die Een wat jy volg.
Jy begin hierdie reis wanneer jy op die pad na Ashoop agterkom dat daar níks is wat jou daar hou nie. Dat hierdie pad geen moontlikhede bied nie. Dit lei na nêrens; dit is ’n doodloopstraat.
Wanneer jy dan die Jesus-pad betree, verander alles. Veral jou uitkyk op die lewe. “Goed vir my” is nie meer jou lewensrigting nie; “goed vir jou” word jou fokus.
•Hoeveel van die doodgoeie, gewone pad probeer jy steeds op die Jesus-pad saam met jou dra?
•Daar is ’n groot verskil tussen Jesus-as-Enigste en Jesus-onder-andere. Ons vals self mislei ons hier wanneer ons met laasgenoemde tevrede is. Hoe, dink jy, kan hierdie valsheid in jou lewe ontmasker word?
Gebed: Here, as ek U as ’n add-on gebruik, moet U my dit wys. Ek wil U graag as my enigste moontlikheid dien.
Geloofsgewoonte 7: Bedink waarom, dan hoe
Dit was nog altyd gelowiges se behoefte om ’n lewe van intimiteit met God te kan ervaar. Om Jesus-dissipels te wees, en om só heling in ’n stukkende wêreld te bring. Dit is die geloofsdroom.
’n Filosoof het eenmaal gesê: “As jy ’n rede het waarvoor jy leef (noem dit jou droom), dan sal jy ’n manier vind om dit ’n werklikheid te laat word.”
Of soos iemand anders dit verwoord het: “If you’ve got a why to live for, you will cope with the how.”
En dit is so. Die “waarom” moet eers duidelik uitgespel word voordat jy die vraag na “hoe” kan aanpak.
Geloofsgewoontes is die hóé. Maar, nee, ons wil nie “hóé”-uitblinkers wees nie. Ons wil uitblink in die verwerkliking van ons droom. Daarom span ons allerlei hulpmiddels in.
Want ons het ’n behoefte aan gesprek met God, maar … hoe moet ons bid? Ons weet dat ons die Bybel verantwoordelik en in konteks moet lees … maar presies hoe kry ons dit reg? Ons wil ander help … maar hoe moet ons te werk gaan?
Hier help Paulus ons. Sy raad aan Timoteus is: “Oefen jou … om in toewyding aan God te lewe” (1 Tim 4:7) – en net daarná verduidelik hy aan die jong man hoe hy te werk moet gaan.
Ons probleem is dikwels dat ons nie altyd so ’n brandende begeerte het om ons “waarom” of ons “hoe” te ontdek nie. Meister Eckhart sê: “Die rede waarom ons God nie in die lewe herken nie, is te wyte aan ons gebrekkige behoefte daaraan om Hom te sien.”
Geloofsgewoontes se bedoeling is om die “gematigde” behoefte in ’n “intense” behoefte te verander.
Ek lees die volgende in NS Whitley se boek The Lost Art of Spiritual Disciplines: “Your pursuit will never be greater than your disciplines.”
Dink nou ’n bietjie oor die volgende:
•Uit watter van die geloofsgewoontes wat jy inoefen, kry jy die meeste waarde? Hoekom?
•Identifiseer die een faset van jou lewe waar daar groei nodig is. Praat ook met ander mense hieroor. Vra desnoods dat iemand jou hiermee moet help. Soms is ménse die “hoe” …
Конец ознакомительного фрагмента.
Текст предоставлен ООО «ЛитРес».
Прочитайте эту книгу целиком, купив полную легальную версию на ЛитРес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.