Assunta Spina: In due atti. Di Giacomo Salvatore

ha visto passare il giudice Bernardi?

Sgueglia

      Nonzignore.

L'uomo seduto accanto a Torelli

      Volete 'o giudice Bernardi?

La signora

      Per favore!

L'uomo c. s

      Sta abbascio 'o cafè. S'è sospesa l'udienza.

La signora

      Oh! Grazie sa! (via per la destra).

Sgueglia

(a don Peppino)

      'A vedite chella signora? 'A sera, a San Carlo, canta dentro agli Ugonotti. E 'a matina vene cca ncoppa…

Don Peppino

      E mena stuccate.

Un uomo

(dal fondo, chiamando Sgueglia)

      Don Diodà! (Sgueglia si volta). Potete venì nu mumento qua?

Sgueglia

      Pronto! (a don Peppino) Permettete? (s'alza e va in fondo).

Una contadina

(Porta un paniere infilato al braccio e si conduce una villanella per mano. Incontrandosi con un contadino che viene dalla sinistra)

      Oi cumpare Tumaso!

Il contadino

      Oi cumare Santella! E che ce state a fa ccà ncoppa?.. Pe Micalangelo ce state?..

La contadina

      E buie che ce state, neh, cumpare Tumaso?

Il contadino

      Mbè! pe testimmone. Ccà stace pure lu prèvete 'e Santa Zufia.

La contadina

      Addo' è ca 'o voglio vasare la mano! (alla villanella) Menechè, ce stace pure lu prevete 'e Santa Zufia!

Un grosso prete

      E tu che faie ccàne? (alla cafona che gli bacia la mano).

La contadina

      Pe Micalangelo, parrucchià!

(Il prete scosta Sgueglia che torna)

Sgueglia

      Parrucchià, nun buttate! (va a sedere alla sua tavola).

Portiere della 8.ª

(forte)

      Causa Mazzucchelli! I testimoni!

La contadina

      Uh, Mamma Ncurunèta! E chesta è 'a causa 'e Micalangelo, parrucchià!

Il grosso prete

(pigliando tabacco, indifferente)

      E va, va, a nomme de Dio!

La contadina

(trascinando la figlia)

      Uh, aneme de lu Priatorio! E purtatemmillo nzarvamiento! Uh, Micalangelo mio!.. (entra nella 8.ª Sezione. Il prete v'entra anche lui).

      SCENA SECONDA

      Michele Boccadifuoco, dalla destra, in mezzo a due carabinieri, ammanettato. È un uomo sui trentacinque, alto, robustissimo, pieno di forza. Un terzo carabiniere allontana la folla che segue Michele. Nella folla sono Filomena, Furturella e Tittariello.

      La folla nella sala tace, curiosa.

1.º Carabiniere

(alla folla che impedisce il passo)

      Passaggio! Passaggio!

(si arrestano per un momento)

Michele

(voltandosi)

      Sie' Filumè?.. Addo' sta?..

Filomena

(si fa largo)

      Sto ccà.

Michele

      Mamma addo' sta?

Filomena

      Sta ccà: sta venenno appriesso…

Michele

      Tenitevella mmiezo a bbuie!

Filomena

      Stateve a penziero cuieto.

Michele

(cercando con lo sguardo nella folla)

      Furtù!

2.º Carabiniere

(lo spinge)

      Avanti!

Michele

      Nu mumento, brigadie'! Pe favore!

Furturella

      Don Miche', che bulite?

Michele

      Teniteve a mmamma mmiezo a bbuie! Datele chiacchiere!

Portiere

(ai carabinieri, uscendo sulla porta della 5.ª Sezione)

      Jammo cu stu detenuto!

1.º Carabiniere

      Avanti!

(Entrano nella 5.ª Sezione)

Furturella

(a Michele)

      Jate! Lassate fa Dio ca è cosa 'e niente! (a Filomena) Ah, Signò! E ched'è? 'Onna Cuncetta è rummasa abbascio?

Filomena

      Sta ccà. Chella è gravante e nu' po' correre.

Tittariello

      Sta saglienno 'a gradiata chiano chiano. 'A vedite lloco…

      SCENA TERZA

Donna Concetta

(tra altre femmine)

Concetta

(ansimando)

      Ah, Mamma d' 'a Libbera! Io si nun moro stammatina nun moro cchiù!

Filomena

      E assettateve! (a Sgueglia) Neh, signori mieie, ce putite favurì na seggia? (prende una sedia dal tavolo di Sgueglia).

Sgueglia

      Bella figlió, ca ccà 'e segge ce servono!

Filomena

      E ba buono, me', pe favore… (a Concetta) Assettateve. Curaggio, curaggio!

(Concetta siede. Tutte le donne le si mettono, impiedi, attorno)

Concetta

      E che guaio niro, neh, che guaio niro ch'è chisto!

Filomena

      Avite raggione! Ma vedite, io mo ve vulesse dicere na cosa… (si volta e prende un'altra sedia) Già, vuie sapite (siede) ca io so chiara e sincera e chello che tengo mmocca tengo pure…

Sgueglia

      Dentro al cuore. Bella figliò, v'avite pigliata n'ata seggia!

Furturella

      'O ssapite, si nun 'o ttenite p'offesa mo v' 'e pavammo sti segge!

Sgueglia

      E che stammo int' 'a cchiesa?

Tittariello

(con aria spavalda)

      Va bene, prufessò. Mme pare ca mo vi fate troppo a ttenere per una picciulezza di nisciunissima cunziquenza!

Sgueglia

      È vero?

Tittariello

      Ci vuole un poco di sciordezza!

Sgueglia

(alzandosi)

      Ma, vedete, io sta sciurdezza…

Furturella

      E va buono me! È cosa 'e niente… (sottovoce a Sgueglia) (Nun 'o rispunnite) Signo', aggiate pacienza!..

Sgueglia

(turbato, torna a sedere al suo posto)

      Anzi! Vi prego. Fate 'o comodo vostro. Volete un'altra sedia?

Cerinaro

(accostandosi a Sgueglia)

      Cerini volete!

Sgueglia

(irritato, gridando)

      Vattenne! (Mo mm' 'a sconto c' 'o cerenaro)!

Concetta

(a Filomena)

      Addo' se fa, sta causa?

Tittariello

(indica la 5.ª Sezione)

      Là, rimpetto.

Concetta

      E ched'è? Già è accumminciata?..

Furturella

      Tittarie', trase, va vide!

(Tittariello entra nella 5.ª Sezione)

Concetta

      Michele addo' sta?

Furturella

      È trasuto llà dinto.

Concetta

      Allora è accumminciata?

Voce di usciere dalla 5.ª

      I testimoni, fuori!

Concetta

      Uh, Mamma d' 'a Libbera! Io t' 'o metto int' 'e mmane toie miraculose! Avummaria e grazia plena!