wat heelnag verwytend roep
oor jy vertrek het,
oënskynlik sonder om te groet.
Teen die blou
Ure lank hou ek my duiwe dop:
die staalblou glans, die vermiljoen van oë en pote,
hoe hulle pronk rondom kos- en waterbak.
In sirkels kolk my duiwe
al hoër teen die blou, die blou.
Laatmiddag keer hulle terug,
mik-mik, vlieg dan een-een hok toe
vir die nag,
in neste of op houtsparre
koester hul mekaar.
Toe ek koshuis toe vertrek
moes hulle weg.
Drie kom later terug,
wag op die huis se dak.
Die ogiesdraad nou opgerol,
pale en houtsparre
eenkant op ’n hoop gepak.
Klein swart radio
Soveel Sondae om nege
saam vir die oordenking
op ’n klein swart radio.
In die kromming van ’n leunstoel
is jy ’n fyn, bleek voëltjie, rug na die venster
vang die son jou skouer.
Hande gevou, kombersie oor die bene,
die oë wimperloos gesluit. ’n Bont gebreide mussie
steek die haardons weg.
Ná jou vertrek erf ek die radio.
Luister nuus,
weervoorspelling, ’n verkeersverslag.
Laat saans draai ek die stelknop
tot ’n skaars hoorbare gesuis.
Ore gespits vir ’n noodberig
hoor ek jou boodskap van die ander kant.
Afrekening
Ná jare betrap ek my steeds
dat ek jou lastige gewoontes
naboots. Sien ek jou oë,
dieselfde moeë lyne langs jou mond.
Neig ook om met die hande
te gesels, stap geboë,
roer soos ’n wilger in die wind.
Onttrek my aan geselskap,
leef al meer ingeskulp,
worstel snags in drome nou
om my aan jou te openbaar.
Конец ознакомительного фрагмента.
Текст предоставлен ООО «ЛитРес».
Прочитайте эту книгу целиком, купив полную легальную версию на ЛитРес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.