Великий Канон. Творение преподобного Андрея Критского. Святой Преподобный Андрей Критский

5

      Ирмос: От но́щи у́тренююща, Человеколю́бче, просвети́ молю́ся, и наста́ви и мене́ на повеле́ния Твоя́, и научи́ мя Спа́се, твори́ти во́лю Твою́.

      В нощи́ житие́ мое́ преидо́х при́сно, тьма бо бысть и глубока́ мне мгла, нощь греха́, но я́ко дне сы́на, Спа́се покажи́ мя.

      Руви́ма подража́я окая́нный аз, соде́ях беззако́нный и законопресту́пный сове́т на Бо́га Вы́шняго, оскверни́в ло́же мое́, я́ко о́тчее он.

      Испове́даюся Тебе́ Христе́ Царю́: согреши́х, согреши́х, я́ко пре́жде Ио́сифа бра́тия прода́вшии, чистоты́ плод и целому́дрия.

      От сро́дников пра́ведная душа́ связа́ся, прода́ся в рабо́ту сла́дкий, во о́браз Госпо́день; ты же вся душе́ продала́ся еси́ злы́ми твои́ми.

      Ио́сифа пра́веднаго и целому́дреннаго ума́ подража́й, окая́нная, и неиску́сная душе́, и не оскверня́йся безслове́сными стремле́ньми при́сно беззако́ннующи.

      Аще и в ро́ве поживе́ иногда́ Ио́сиф, Влады́ко Го́споди, но во о́браз погребе́ния и воста́ния Твоего́, аз же что Тебе́ когда́ сицево́е принесу́?

      Слава, Троичен: Тя Тро́ице сла́вим, Еди́наго Бо́га: Свят, Свят, Свят еси́ Отче, Сы́не, и Ду́ше, Про́стое Существо́, Еди́нице при́сно покланя́емая.

      И ныне, Богородичен: Из Тебе́ облече́ся в мое́ смеше́ние, нетле́нная, безму́жная Ма́ти Де́во, Бог созда́вый ве́ки, и соедини́ Себе́ челове́ческое естество́.

      Песнь 6

      Ирмос: Возопи́х всем се́рдцем мои́м к ще́дрому Бо́гу, и услы́ша мя от а́да преиспо́дняго, и возведе́ от тли живо́т мой.