Spreuke van C.J. Langenhoven
Jan Scannell
Tafelberg
Liefde en vriendskap
Deur twee dinge is my lewe
vir my leefbaar gemaak:
die liefde wat ek gegee het,
en die liefde wat ek gekry het.
Die gedienstige engel
het gekom in ’n huis waar daar liefde was
en met ’n glimlag omgedraai en gesê:
My diens is hier oorbodig.
•
Alle godsdiens is liefde
en die meeste liefde is afgodsdiens.
Wie liefde verwar met sinnelikheid
sien ’n engel aan vir ’n aap.
•
Hoe korter jy jou kuier maak,
hoe gouer sal jy weer genooi word.
•
Om my naaste lief te hê
is vir my ’n sware gebod.
Met die mense daar gunter
kry ek dit op ’n manier nog reg
Dis makliker om die gemeente lief te hê
as jou buurman
en die hele menslike geslag
as jou vrou se familie.
•
As twee vriende eenmaal getwis het,
kan hulle vrede maak,
maar die vorige vriendskap
kry hulle nooit weer terug nie.
Buiten wanneer hulle met mekaar getroud is.
As jy regtig wil seermaak, soek iemand
wat jou liefhet.
Jy sê “ja” waar jy moes “nee” gesê het
omdat jy die ander nie wil aanstoot gee nie.
Maar reken hoe het hy
jou aanstoot gegee met sy versoek!
•
Aan ’n nuwe wa kan jy sien
of dit ’n goeie skilder was,
aan ’n oue of dit ’n goeie wamaker was.
Trek liewer vir jou vriend jou broek uit
as om vir hom vir ’n baadjie borg te staan.
Anders loop julle naderhand albei nakend.
•
Die prys van vrede is vooruit betaalbaar,
dié van twis agterna.
Hoe meer tevrede ’n man met my is,
hoe meer tevrede is ek met hom.
En hoe gouer is ons al twee ontevrede.
•
Borgskap is ’n kind van vriendskap,
maar hy vermoor graag sy ouer.
As jy nie van iemand hou nie,
doen hom ’n weldaad.
Daarna sal jy hom liefhê.
Die teëspoed sif die vriende uit
wat die voorspoed geoes het.
•
Die manteldraaier maak vriende
ál in die rondte,
totdat hy op die end
ál in die rondte vyande het.
•
Ware vriendskap
is nie te koop nie,
want vriendskap vind nie sy lus
in neem nie, maar in gee.
Liefde is nie kunsmatig nie.
Die vriendskap wat jy moet koop
is ’n duur artikel.
Jy sal nie weer jou prys kry
as jy dit van die hand wil sit nie.
•
Gooi vir jou gas “tjiekorie” by die koffie,
en hy sal die “tjiekorie” onthou
en die koffie vergeet.
Moenie vriendskap en besigheid meng nie –
jy bederf albei.
•
’n Man wat nie vyande het nie
deug nie vir ’n vriend nie.
•
Stuur jou buurman se vee skut toe
en vind die skutgeld te min
om vir jouself nog ’n veewagter te huur.
Maak jou vriendelikheid goedkoop
en hou jou vriendskap duur.
•
Afwesigheid is die vyand van liefde
en die vriend van vriendskap.
•
Moenie jou vriend vergeet nie;
dit sal hom seermaak.
Maak jou vyand daarmee seer.
Daar is één opsig waarin ek my dierbaarste vriend
net so behandel soos my
bitterste vyand:
Ek steek my skande vir albei ewe sorgvuldig weg.
Dooie vriendskap
is die aas van wetsgeleerde kraaie.
•
’n Skare is ’n versameling van eensames.
•
Moenie by die hemel gaan soek na die engele nie;
soek by die engele na die hemel.
Wat ek van Job die meeste bewonder
is nie die geduld
wat hy onder sy teëspoed betoon het nie,
maar dié wat hom gekeer het
dat hy sy drie vriende
een vir een by die deur uitskop.
•
Koop jou wingerdstokkies van jou buurman.
Jy het nie
die vreemde wingerd se druiwe geproe nie.
Dis nie reg van my buurman om te bid vir reën
solank as my gerwe nog op die land lê nie.
Waarom dink hy net aan sy eie belange?
•
Vat al die kwaad wat jy in jou buurman sien
en al die goed wat jy in jouself sien
en maak ’n derde mens daaruit.
Hy sal maar naastenby lyk